बंदिस्त
बंदिस्त
परंपरेची गुलाम होऊन
भोगवटा पदरी घेतेस ,
पंख कापल्यावरही ....
फडफडत 'बंदिस्त' हेच
जीवन स्विकारतेस !
सोन्याच्या पिंजऱ्यातला
उसना श्वास....शान....
बेगडी प्रेमापुढे नाचत
राहते कठपुतळीसमान
जगाच्या तालावर !
साचा पक्काच पुरुषप्रधानतेचा ,
मारीत राहतो नित शिक्का गुलामीचा ,
जन्मजात सारे अधिकार
गमावून बसलेली तू ...
फक्त ऊरतेस
नर वसाहत म्हणून !
पूजली जाते देवी म्हणून
स्वार्थ साधत होते शोषण
वारंवार...क्षणोक्षणी संपत राहते
तरी उरत राहते पानापानातुनी
इतिहासाच्या!
जन्मताच गाडते 'स्व' ला ,
उभारत राहते तुझ्यातला माणूस ,
धनाला वारस देत
नावागावासकट
मिटतेस !
फक्त आणि फक्त देण्यासाठीच
का जन्म तुझा? , अन होत
राहते दान तुझेच , उधळली जाते
वस्तू म्हणून डावावर
'महान योद्धा ' नावाच्या
पुरुषाकडूनही!