દિલને રજા
દિલને રજા
ફાટે કે ન ફાટે તું, ચીરા કે ન ચીરા તું,
અરે દિલ ! તેં કર્યો બેહાલ: મારે કે ન મારે તું !
ભલે ધડકી રહે છાનું, ભલે બળી કોયલો થા તું,
ખરી જા તું મને તો શું ? ઠરી જા તું મને તો શું ?
રખે કાંટો તને લાગે, કમલ જાણી તને રાખ્યું,
પરન્તુ તું જ કાંટો છે, ઉડી જા તું: ગળી જા તું !
દુનિયા છે તને ખારી, હવે છે તું મને ખારૂં,
તું કોઈનું નથી તો હું ન ત્હારો છું ન મ્હારૂં તું !
જુની પ્રીતિ ગઈ તૂટી ! નથી તૂટી તણી બૂટી !
ખૂટી ગઈ વાટ દીવાની, પછી બળવું રહ્યું ક્યાંથી ?
હવે બ્રહ્માંડમાં હું છું: હવે બ્રહ્માંડમાં તું છે:
પ્રીતિ તો આપણી એ છે ! મિલાવો આપણો એ છે !