ପ୍ରେତର ପ୍ରତିଶୋଧ ଭାଗ୧୨

        ଫେରିବା ସମୟରେ କାଳୀ ପ୍ରସାଦଙ୍କର ଚରିତ୍ର , ବ୍ୟକ୍ତିତ୍ଵ ଓ ମନ୍ତବ୍ୟ ଉପରେ ଗଭୀର ଚିନ୍ତା କରୁଥିଲି । ସେ ମୋତେ ସ୍ପଷ୍ଟବାଦୀ ଓ ନୀରହଙ୍କାରୀ ଲାଗୁଥିଲେ । କିନ୍ତୁ ସେଇ ଅନୁପାତରେ ତାଙ୍କର ବ୍ୟକ୍ତିତ୍ଵ ବଡ ରହସ୍ୟମୟ ଓ ଗଭୀର ଥିଲା । ଜଣେ ସାଧାରଣ ଲୋକ ପକ୍ଷରେ ତାଙ୍କୁ ବୁଝିବା ସହଜ ଓ ସମ୍ଭବପର ନୁହେଁ ବୋଲି ମୋର ମନେ ହେଉଥିଲା । ସେ ମୋତେ କହିଥିବା କଥା ଗୁଡ଼ିକ , କେସଟିକୁ ଅଧିକ ଜଟିଳ କରୁଥିଲା । 

         କାଳୀ ପ୍ରସାଦଙ୍କର କହିବା ଅନୁଯାୟୀ ପଣ୍ଡିତଙ୍କୁ କେହି ହତ୍ୟା କରିନାହାନ୍ତି । ତେବେ କଣ ସେ ଆତ୍ମହତ୍ୟା କରିଥିଲେ ? ଜଣେ ବ୍ୟକ୍ତି ନିଜେ ନିଜ ମୁଣ୍ଡକୁ ଶରୀରରୁ ଅଲଗା କରିବା କେତେଦୂର ସମ୍ଭବ ? ଦ୍ଵିତୀୟରେ କାଳୀ ପ୍ରସାଦଙ୍କୁ ମୋ ପତ୍ନୀଙ୍କ ଅବସ୍ଥା କିପରି ଜ୍ଞାତ ହେଲା ? ସର୍ବଶେଷରେ ଗୋଟିଏ ପାରାକୁ ନିଜ ଭାଇ ବୋଲି କହିବା , କେତେଦୂର ସମୀଚିନ ? ମୁଁ ଗୋଟାଏ ପାଗଳ ହାବୁଡ଼ରେ ପଡ଼ିଯାଇନି ତ ? କିମ୍ବା ଏପରି ମଧ୍ଯ ହୋଇପାରେ , କାଳୀ ପ୍ରସାଦ ବାସ୍ତବିକ କୌଣସି ଆଲୌକିକ ଶକ୍ତିର ଅଧିକାରୀ ।

        ମନଭିତରେ ଗୁଡାଏ ପ୍ରଶ୍ନ ଓ ଦୁଶ୍ଚିନ୍ତା ଧରି ହୋଟେଲକୁ ଫେରିଲି । ରୁମକୁ ଆସି ଦେଖିଲି ପତ୍ନୀ ଟି.ଭି. ଦେଖୁଥିଲେ । ସବୁ ନର୍ମାଲ ଥିଲା । ମନେ ମନେ ଇଶ୍ୱରଙ୍କୁ ଧନ୍ୟବାଦ ଦେଇ ଡିନର ସାରି ବିଶ୍ରାମ ନେଲି ।

      ପରଦିନ ପ୍ରଭାତରୁ ଉଠି ବ୍ରେକଫାଷ୍ଟ ସାରିଦେଇ କାଳୀ ପ୍ରସାଦଙ୍କ ନିକଟକୁ ବାହାରିଲି । ପତ୍ନୀଙ୍କର ଲଞ୍ଚ ପାଇଁ ହୋଟେଲରେ ରୁମସର୍ଭିସ ଦେଇ ଦେବାକୁ ୱେଟରକୁ କହିଦେଇ ଗଲି । 

        ମନ୍ଦିରରେ ଘଣ୍ଟ ଓ ମୃଦଙ୍ଗ ବାଦନ ସହିତ ସକାଳର ଆଳତୀ ଚାଲିଥିଲା । ଅତଏବ ବାହାରେ ଥାଇ ମା'ଙ୍କ ଉଦ୍ଦେଶ୍ୟରେ ପ୍ରଣାମ କରିସାରି କାଳୀ ପ୍ରସାଦଙ୍କ ରହିବା ସ୍ଥଳୀକୁ ଆସିଲି । କିଛି ସମୟପରେ କାଳୀ ପ୍ରସାଦ ମୋ ନିକଟକୁ ଆସି ମୋତେ ପ୍ରସାଦ ଦେଇ ସାରିବା ପରେ ଭିତରକୁ ଡାକିଲେ । 

        ଭିତରକୁ ଯାଇ ଦେଖିଲି ,ଗତକାଲି ଭଳି କୋଠରୀରେ ଧୂନି ଜଳୁଥିଲା ।

' ଆଜି ବାହାରେ ବସିବା । ଥଣ୍ଡା ଲାଗିବ' । ଦୁଇଟି ଚଉକି ଆଣିବା ଭିତରେ କାଳୀ ପ୍ରସାଦ କହିଲେ । ବାହାର ବାରଣ୍ଡାରେ ଟିକିଏ ଖୋଲାସ୍ଥାନ ଦେଖି ଉଭୟ ବସିଲୁ ।...

'ଆଉ କଣ ଜାଣିବାକୁ ଚାହାଁନ୍ତି ପଚାରନ୍ତୁ । ମୋତେ କାଲି ପ୍ରଭାତରୁ ଏକ ଜରୁରୀ କାମରେ ବାହାରକୁ ଯିବାକୁ ହେବ ' । ନିରବତା ଭାଙ୍ଗି କାଳୀ ପ୍ରସାଦ ପ୍ରଥମେ କଥା ଆରମ୍ଭ କଲେ ।

' ପଣ୍ଡିତ ଗଣନାଥ ଶର୍ମାଙ୍କର ମୃତ୍ୟୁର କାରଣ କଣ ହୋଇପାରେ '? ମୁଁ ସିଧା ସଳଖ ମୋ ପଏଣ୍ଟ ଉପରକୁ ଆସିଲି ।

' ପ୍ରତିଶୋଧ ; ଗଣନାଥ ତା'ର ଏକମାତ୍ର ପୁତ୍ରର ହତ୍ଯାକାରୀମାନଙ୍କ ଠାରୁ ପ୍ରତିଶୋଧ ନେବା ଲାଗି ନିଜର ଆତ୍ମବଳୀ ଦେଇଛି 'I ନିର୍ବିକାର ସ୍ଵରରେ କାଳୀ ପ୍ରସାଦ କହିଲେ ।

' ନିଜର ମୃତ୍ୟୁ ପରେ ସେ କିଭଳି ପ୍ରତିଶୋଧ ନେଇପାରିବେ '?

'ତା'ର ଆତ୍ମା ନେବ । ସେଇଥିପାଇଁ ତ ସେ ସ୍ଵଇଚ୍ଛାରେ ମୃତ୍ୟୁକୁ ବରଣ କଲା ।

'ଏକଥା କଣ ସମ୍ଭବ ? ଅପମୃତ୍ୟୁ ବା ଷଡ଼ଯନ୍ତ୍ରର ଶିକାର ହୋଇ ମରୁଥିବା ଲୋକମାନଙ୍କର ଆତ୍ମାମାନେ ତେବେ ପ୍ରତିଶୋଧ ନେଇ ପାରୁନାହାନ୍ତି କଣ ପାଇଁ '? ମୁଁ ପ୍ରଶ୍ନ କଲି ।

'ନେଇପାରୁ ନାହାନ୍ତି ବୋଲି ଆପଣ କିପରି ଜାଣିଲେ '? କାଳୀ ପ୍ରସାଦ ମୃଦୁ ହସି ପଚାରିଲେ ।

ମୁଁ ସାମାନ୍ୟ ଥତମତ ହୋଇ ନିରବ ରହିଲି ।

'ଦେଖନ୍ତୁ '! କାଳୀ ପ୍ରସାଦ ବୁଝେଇବା ଢଙ୍ଗରେ କହିଲେ , ' କିଛି ଅପରାଧି ଆତ୍ମହତ୍ୟା କାହିଁକି କରୁଛନ୍ତି ? କଣ ଅନୁତାପରେ ? ନା ; ସେମାନଙ୍କୁ ତାହା କରିବା ଲାଗି ବିବଶ କରାଯାଉଛି । ଆଉ କିଛି ଅପରାଧି ବିଭିନ୍ନ ଦୁର୍ଘଟଣାର ଶୀକାର ହୋଇ ମରୁଛନ୍ତି । ଆଉ କେତେକ ପାଗଳ ମଧ୍ଯ ହେଇଯାଉଛନ୍ତି । ହୁଏତ ଏସବୁ ପଛରେ କିଛି ଅଦୃଶ୍ୟ ଶକ୍ତିର ହାତ ଥାଇପାରେ , ଏକଥା ଆପଣ କାହିଁକି ଭାବୁନାହାନ୍ତି ? ଆପଣଙ୍କ ବୁଝିବା ପାଇଁ କହୁଛି । ଏ ସବୁ କ୍ଷେତ୍ରରେ ଆମେ ଆତ୍ମାକୁ ମୁଖ୍ୟତଃ ଦୁଇ ପ୍ରକାରର ଭାବି ପାରିବା। ଦୁର୍ବଳ ଓ ଶକ୍ତିଶାଳୀ । ନିକଟରେ ପଶୁରୁ ମନୁଷ୍ୟ ହୋଇଥିବା ବ୍ୟକ୍ତିର ଆତ୍ମା ଦୁର୍ବଳ । ନିଜର ମୃତ୍ୟୁ ପରେ ଏଭଳି ଆତ୍ମା କିଛି ମନେ ରଖିପାରନ୍ତି ନାହିଁ । କିନ୍ତୁ ବହୁତବାର ମନୁଷ୍ୟ ଜନ୍ମ ନେବା ପରେ ଆତ୍ମା ବଳଶାଳୀ ହେବାକୁ ଲାଗେ । ତାର ଉଚ୍ଚ ସଂସ୍କାର ହୁଏ ଓ ସେ ମୃତ୍ୟୁ ପରେ ମଧ୍ୟ ବହୁତ କଥା ମନେ ରଖିପାରେ । ଛୋଟ ଛୋଟ ଶିଶୁ ଅଦ୍ଭୁତ ଧିଶକ୍ତି ପାଇ ଜନ୍ମ ହେବା ଏହାର ପ୍ରମାଣ । ଏମାନେ ପୂର୍ବଜନ୍ମର ଜ୍ଞାନ ଓ ଅନୁଭୂତିକୁ ପାଶୋରି ନଥାନ୍ତି । ଗତଜନ୍ମର ସମସ୍ତ ମୁଖ୍ୟ ଘଟଣାବଳୀର ସାରାଂଶ ସଂସ୍କାର ଭାବେ ଏମାନଙ୍କର ଆତ୍ମା ସାଙ୍ଗରେ ପରଜନ୍ମକୁ ଯାଇଥାଏ । ଶଙ୍କରାଚାର୍ଯ୍ୟ ଶିଶୁ ସମୟରେ ବେଦ ଗାନ କରିବା , ସ୍ୱାମୀ ବିବେକାନନ୍ଦ ଶିଶୁ ଥିବା ବେଳେ ଧ୍ୟାନସ୍ଥ ହେବା ବା ପରମହଁସ ଶିଶୁଥିବା ବେଳେ ପ୍ରକୃତିର ଶୋଭାରେ ତନ୍ମୟ ହୋଇ ମୂର୍ଚ୍ଛା ଯିବା ଘଟଣା , ଏ ସବୁର ପ୍ରମାଣ । ଶିଶୁଟିଏ କୌଣସି ବାଦ୍ୟଯନ୍ତ୍ର ବାଦନରେ ଅଥବା କୌଣସି ବିଶେଷ କଳାରେ ପାରଦର୍ଶିତା ହାସଲ କରିବା ଇତ୍ୟାଦି, ସାଧାରଣ ଜୀବନରେ ଆମେ ଏପରି ଘଟଣା କେବେ କେବେ ଦେଖୁଛେ ମଧ୍ୟ । ମନୁଷ୍ୟ ଜାତିସ୍ମର ହୋଇ ନିଜ ପୂର୍ବଜନ୍ମ କଥା କହିବାର ଅନେକ ଦୃଷ୍ଟାନ୍ତ ଅଛି । ତନ୍ତ୍ରଶାସ୍ତ୍ର ପଢିଥିବା ବ୍ୟକ୍ତି ଏସବୁ ସହଜରେ ବୁଝିପାରିବ । ଗଣନାଥ ଏସବୁ ଭଲଭାବରେ ଜାଣିଥିଲା । ପୁଅର ମୃତ୍ଯୁ ପରେ ଶୋକରେ ଅଧିର ହୋଇ ଏହି ବ୍ୟାକୁଳିତ ଅବସ୍ଥାକୁ ସେ ନିଜ ଆତ୍ମା ସଙ୍ଗରେ ସଂସ୍କାର ଭାବରେ ନେବାକୁ ଚାହିଁଲା । ତେଣୁ ମୃତ୍ୟୁପରେ ଏ ସବୁ ଭୁଲି ନଯାଇ ନିଜ ଇଚ୍ଛା ମୁତାବକ କିଛି କାର୍ଯ୍ୟ କରିପାରିବାର ଶକ୍ତି ପ୍ରାପ୍ତି ଲାଗି ସେ , ସମସ୍ତ ଶକ୍ତିର ମୂଳକେନ୍ଦ୍ର ତଥା ଆଦିଶକ୍ତି ମା' ମହାକାଳୀଙ୍କୁ ଆବାହନ କରି ଦେବୀଙ୍କୁ ନୈବେଦ୍ୟ ଭାବରେ ନିଜ ପ୍ରାଣକୁ ସମର୍ପଣ କରିଦେଲା '। .... ଟିକିଏ ନିରବ ହୋଇ କାଳୀ ପ୍ରସାଦ ବିଶ୍ରାମ ନେଲେ ।

'ତା'ପରେ '? ମୁଁ କୌତୁହଳରେ ପଚାରିଲି । କାଳୀ ପ୍ରସାଦଙ୍କ କଥାରେ କିଛିଟା ସତ୍ୟତା ଥିଲେ ବି ସବୁକଥାକୁ ମୁଁ ପୂର୍ଣ୍ଣରୁପେ ବିଶ୍ୱାସ କରିପାରୁ ନଥିଲି।

'କାଲି ଗଣନାଥ ମୃତ୍ୟୁର ଏକ ପକ୍ଷ ପୂର୍ଣ୍ଣ ହେଉଛି । ଏହାପରେ ସେ ସଂପୂର୍ଣ୍ଣ ପ୍ରେତଲୋକରେ ପ୍ରବେଶ କରିବ । ପନ୍ଦରଦିନ ହେଲା ମୁଁ ସେ ଧୂନିରେ ଆହୁତି ଦେଇ ଚାଲିଛି । ପ୍ରତ୍ୟେକ ଥର ତା'ର ସଂକଳ୍ପକୁ ପୂର୍ଣ୍ଣସ୍ମରଣ ପୂର୍ବକ ମନ୍ତ୍ରପୁଟ କରି ଅଗ୍ନିରେ ଘୃତାହୁତି ପ୍ରଦାନ କରୁଛି । ଏବେ ସେ ସମସ୍ତ ଘଟଣା ମନେ ପକାଇ ପାରୁଛି । ଏହାପରେ ସେ ତା ସଂକଳ୍ପ ପୁରା କରିବ' । କାଳୀ ପ୍ରସାଦ ଏତକ କହିସାରି ଦୀର୍ଘ ନିଶ୍ଵାସ ଛାଡିଲେ ।

' ପଣ୍ତିତ ଗଣନାଥ ଶର୍ମା ଏବେ କ'ଣ ପାରା ରୂପରେ ଅଛନ୍ତି '? ପରିସ୍ଥିତିକୁ ହାଲକା କରିବା ଉଦ୍ଦେଶ୍ୟ ନେଇ ମୁଁ ସାମାନ୍ୟ ଥଟ୍ଟାଳିଆ ସ୍ଵରରେ  ପଚାରିଲି 'I 

' ପାରା ରୂପରେ ନୁହେଁ , ପାରାକୁ ଆଧାର କରି ଅଛନ୍ତି । ମନୁଷ୍ୟର ଶରୀର ପଞ୍ଚ ମହାଭୂତର ତତ୍ତ୍ଵକୁ ନେଇ ଗଠିତ । ମୃତ୍ୟୁପରେ ପୃଥିବୀ ଓ ଜଳ ତତ୍ତ୍ଵ ,ଏ ଦୁଇଟି ସଂପୂର୍ଣ୍ଣ ନଷ୍ଟ ହୋଇଯାଏ । ବାକି ତିନୋଟି ଦୃଶ୍ୟମାନ ନୁହଁନ୍ତି । ବିନା ଆଧାରରେ ଆପଣ ଅଗ୍ନିକୁ ଦେଖିପାରିବେ ନାହିଁ କିମ୍ବା ବାୟୁକୁ ଅନୁଭବ କରିପାରିବେ ନାହିଁ । ତେଣୁ ବାୟୁ ଓ ଅଗ୍ନି ତତ୍ତ୍ଵକୁ ଆଶ୍ରୟ କରିଥିବା ଆତ୍ମା ,ବିନା ଆଧାରରେ ନିଜର ଉପସ୍ଥିତି ଜାହିର କରିପାରିବ ନାହିଁ । କେବଳ ପାରା ନୁହେଁ , ଏଠାରେ ଆହୁରି ଅନେକ ଆତ୍ମା ,ପଶୁପକ୍ଷୀଙ୍କୁ ଆଶ୍ରୟ କରି ମା'ଙ୍କ ନିକଟରେ ନିଜର ମୁକ୍ତି ଅପେକ୍ଷାରେ ବିଚରଣ କରୁଛନ୍ତି 'I

       ମୋର ଆଉ କିଛି ବୁଝିବାର ନଥିଲା । ପଣ୍ଡିତଙ୍କର ମୃତ୍ୟୁ ହେବା ପଛରେ ଯେ ତାଙ୍କ ନିଜର ଇଚ୍ଛା ବା ସ୍ଵୀକୃତି ରହିଛି , ଏଥିରେ ମୁଁ ଏକମତ ଥିଲି । ଏବେ ଆଗକୁ ତାଙ୍କର ଆତ୍ମା କିଭଳି ଭାବରେ ପ୍ରତିଶୋଧ ନେଉଛି , ସେକଥା ଦେଖିବା ପାଇଁ ଅପେକ୍ଷା କରିବା ବ୍ୟତିତ ଅନ୍ୟ କିଛି ବାଟ ନଥିଲା ।

 ****  କ୍ରମଶଃ  ****