ଓଡିଶା କଙ୍କଡା

       ଦିଲ୍ଲୀ ବିଶ୍ୱ ବିଦ୍ୟାଳୟ ନିକଟରେ ଆର୍ମି କ୍ୱାର୍ଟର୍ସ୍ l ବିଶ୍ୱାବିଦ୍ୟାଳୟ ଛାତ୍ରାବାସରେ ରହିବା ସୁବିଧା ଥିଲେ ମଧ୍ୟ ରୁମ୍ ଅଭାବ ହେତୁ କିମ୍ବା ନିଜର ସୁବିଧା ପାଇଁ ହେଉ, ଅନେକ ଛାତ୍ର ଛାତ୍ରୀ ସେହି ଆର୍ମି କ୍ୱାର୍ଟର୍ସମାନଙ୍କରେ ପେଇଙ୍ଗ୍ ଗେଷ୍ଟ (ପି.ଜି.) ରୁହନ୍ତି l ମୁଁ ଯେଉଁଠି ପି.ଜି. ରହୁଥିଲି, ତାହା ଗୋଟିଏ ତିନି ମହଲା ଫ୍ଲାଟର ଉପରମହଲାରେ ଥିବା କ୍ୱାର୍ଟର୍ସର କୋଣିକିଆ ରୁମଟିଏ l ତଳ ମହଲାରେ ଓଡିଆ ପୁଅଟିଏ ରୁହେ ଜାଣିଥିଲି l କିନ୍ତୁ କେବେ କଥା ହୋଇ ନ ଥିଲି l କଥା ହେବିନି ବୋଲି ନୁହେଁ, ଆବଶ୍ୟକତା ହିଁ ପଡି ନ ଥିଲା l ରକ୍ଷଣଶୀଳ ପରିବାରର ପ୍ରଭାବ ତ ଟିକେ ରହିବ ନିଶ୍ଚୟ l ତେବେ ଗୋଟିଏ କଥା ଭାରି ବିରକ୍ତି ଲାଗେ l ବାହାରେ ଓଡିଶାର ପିଲାମାନେ ପରସ୍ପର ମଧ୍ୟରେ ଓଡିଆରେ କଥା ନ ହୋଇ ଇଂରାଜୀ କିମ୍ବା ହିନ୍ଦୀରେ କଥା ହେବାଟା l ପୁଣି ନିଜକୁ ନିଜେ ଓଡିଶା କଙ୍କଡା କହି, ନିଜର ସମ୍ମାନହାନି କରିବା ଘଟଣା l

       ଦାଦାଙ୍କ ଝିଅ ଆସିଥିଲା ଖରାଛୁଟିରେ ମୋ ପାଖକୁ l ମୋ ପାଖରେ ରହି ବିଭିନ୍ନ ବିଶ୍ୱବିଦ୍ୟାଳୟ ପାଇଁ ପ୍ରବେଶିକା ପରୀକ୍ଷା ଦେଉଥିଲା l ମୁଁ କ୍ଲାସକୁ ଯାଇଥିଲି l ଘରବାଲା ବି କୁଆଡେ ଯାଇଥିଲେ ବୋଧେ l ସେ ସବୁଆଡୁ କବାଟ ବନ୍ଦ କରି ଆମ ରୁମରେ ଶୋଇ ପଡି

ଥିଲା l ଖରା ଦିନ l କୁଲର୍ ଶବ୍ଦରେ କିଛି ଶୁଣା ଯାଉ ନ ଥିଲା ବୋଧେ l କ୍ଲାସରୁ ଫେରି ଅଧ ଘଣ୍ଟା କବାଟ ବାଡେଇ ବାଡେଇ ଥକି ପଡିଥିଲି l କଲିଙ୍ଗ୍ ବେଲ୍ ବି ଖରାପ ଥିଲା l ଫ୍ଲାଟର ସମସ୍ତେ ଆସି ଥରେ ଥରେ ଦେଖି ଚାଲି ଯାଉଥିଲେ l କିନ୍ତୁ କେହି ସାହାଯ୍ୟ କରିବାକୁ ଆଗେଇ ଆସୁ ନ ଥିଲେ l ଏହା ହିଁ ମହାନଗରୀର ବୈଶିଷ୍ଟ୍ୟ l କିଛି ସମୟ ପରେ ଦେଖିଲି ଓଡିଆ ପିଲାଟି ପଶିଲା ଫ୍ଲାଟ୍ ବାଉଣ୍ଡେରୀ ଭିତରେ l ମୋତେ ଦେଖି ବୋଧେ କିଛି ଅନୁଭବ କଲା ଓ ତିନି ମହଲା ଚଢି ଆସିଲା ମୋ ପାଖକୁ l ମୋ ଠାରୁ ସବୁ କଥା ଶୁଣି କିଛି ନ କହି ଗୋଟିଏ ଗୋଟିଏ ହୋଇ ଓହ୍ଲେଇଗଲା ତଳକୁ l ମୋତେ ରାଗ ଲାଗୁଥିଲା l ମନେ ମନେ ଭାବିଲି ସତରେ ଓଡିଶା କଙ୍କଡା l ହଠାତ୍ କିଛି ଗୋଟିଏ ଶବ୍ବ ହେବା ଶୁଣି ଚାହିଁଲି ତଳକୁ l ସେ ମେନ୍ ସ୍ୱିଚ୍ ଅଫ୍ କରି ଦେଇଥିଲା l ତା’ ପରେ ପୁଣି କବାଟ ବାଡେଇବାକୁ ଇଶାରାରେ ନିର୍ଦ୍ଦେଶ ଦେଲା l

       କୁଲର୍ ଶବ୍ଦ ବନ୍ଦ ହେବା ଯୋଗୁଁ ହେଉ କିମ୍ବା ଗରମ ଯୋଗୁଁ ହେଉ, ମନୀଷାର ନିଦ ଭାଙ୍ଗିଲା ଓ ସେ କବାଟ ଖୋଲିଲା l କୃତଜ୍ଞତା ଜଣେଇବା ପାଇଁ ମୁଁ ତଳକୁ ଚାହିଁ ଦେଖେ ତ ମୋ ଫ୍ଲାଟର କବାଟ ଖୋଲିବା ଶବ୍ଦ ଶୁଣି ତଥାକଥିତ ଓଡିଶା କଙ୍କଡାଟି ତା ଫ୍ଲାଟ୍ ଭିତରକୁ ପଳେଇ ଯାଇଥିଲା l