ଅତୃପ୍ତ ମାତୃତ୍ୱ ....

୩ ବର୍ଷ ବୟସରେ ଦିପୁ ମାଛେଉଣ୍ଡ ହୋଇଗଲା । ଏକ ଦୂରାରୋଗ୍ୟ ବ୍ୟାଧିରେ ପ୍ରାୟ ୧୦ ମାସ ଶଯ୍ୟାଶାୟୀ ରହି ପ୍ରାଣତ୍ୟାଗ କରିବା ପର୍ଯ୍ୟନ୍ତ କେବଳ ଗୋଟିଏ ବାକ୍ୟ ପାଟିରୁ ବାହାରୁଥିଲା, 'ମୋ ପରେ ମୋ ଦିପୁର କ'ଣ ହେବ' ?..... ଏବେ ଦିପୁ ମାଉସୀ ପାଖରେ ରହୁଛି । ଗୋଟିଏ ରାତିରେ ମାଉସୀ ଦେଖିଲେ ଦିପୁ କାହା ସହ କଥା ହେଉଛି, ଖେଳୁଛି ଓ ମଝିରେ ମଝିରେ ହସୁଛି । ମାଉସୀ ଉଠି ପଡ଼ି ଦିପୁକୁ ଡାକିଲେ । ଦିପୁ କେବଳ ମାମା ବୋଲି ଥରେ ଉଚ୍ଚାରଣ କଲା ଓ ତା ପରେ ସ୍ୱାଭାବିକ ଭାବରେ ଶୋଇ ପଡିଲା । ପରଦିନ ରାତିର ତୃତୀୟ ପ୍ରହରରେ ମାଉସୀଙ୍କର ନିଦ ଭାଙ୍ଗିଲା । ଶୋଇବା ଘର ଦ୍ଵାର ଖୋଲା ଥିଲା ଓ ଦିପୁ ପୂର୍ବରାତ୍ର ଭଳି କାହା ସାଙ୍ଗରେ ଖେଳୁଥିଲା । ଦିପୁ ! ମାଉସୀ ଥରଥର ସ୍ଵରରେ ଡାକିଲେ । ଦିପୁ ଥରେ ମାଉସୀଙ୍କୁ ଚାହିଁଲା ଓ ଦ୍ଵାର ଆଡ଼କୁ ଚାହିଁ କାନ୍ଦି ଉଠିଲା । ମାଉସୀ ତା ମୁଣ୍ଡ ଆଉଁସିବା ଅବସରରେ ପଚାରିଲେ, କ'ଣ ହେଲା ବାପା,' ? 'ମାମା ଆସିଥିଲା , ମୋ ସାଙ୍ଗରେ ଖେଳୁଥିଲା, ଏବେ ଚାଲିଗଲା, ଦିପୁ କୋହଭରା ସ୍ଵରରେ ଉତ୍ତର ଦେଲା ।