ଉତ୍କଳ ଜନନୀ

ପୁଣ୍ୟଧାମ ନୀଳାଚଳ ଜଗତେ ବିଖ୍ୟାତ

କାଳିଆ ମହିମା ସେ ତ ବିଶ୍ୱରେ ବିଦିତ

କମନୀୟ କାନ୍ତି କୃତି ମନ୍ଦିର ମାଳିନୀ 

ସେଇ ମୋର ପୁଣ୍ୟଭୂମି ଉତ୍କଳ ଜନନୀ ।

କୀରତିରେ ଭାସ୍ୱର ଯା' କୋଣାରକ କଳା 

କାନ୍ଥରେ ତା' କୋଟିକୋଟି କାରୁକାର୍ଯ୍ୟ ଶିଳା 

ବିପ୍ଳବୀ ସେ ସ୍ୱାଭିମାନୀ ବୀର ପ୍ରସବିନୀ 

ସେଇ ମୋର ପୁଣ୍ୟଭୂମି ଉତ୍କଳ ଜନନୀ । 

ଚଷାପୁଅ ଗୀତ ଗାଏ ସୁନା କ୍ଷେତ ହସେ

ପଖାଳ କଂସାର ମୋହ ମହମହ ବାସେ

ଶତ ନଦନଦୀ ତୀରେ ଶସ୍ୟ ଶ୍ୟାମଳିନୀ

ସେଇ ମୋର ପୁଣ୍ୟଭୂମି ଉତ୍କଳ ଜନନୀ । 

ବିହଙ୍ଗମ କାକଳିରେ ଅରଣ୍ୟର ଶୋଭା

ଆହା କି ସେ ମନୋହର ପ୍ରଭାକର ଆଭା!

ସୁଶୀତଳ ନିର୍ଝରେ ସେ ଅମୃତ ଦାୟିନୀ

ସେଇ ମୋର ପୁଣ୍ୟଭୂମି ଉତ୍କଳ ଜନନୀ । 

ଶାନ୍ତି ମୈତ୍ରୀ ପ୍ରୀତିରେ ସେ ଚିର ଅପସରୀ

ଶୁଭ ଶଙ୍ଖନାଦେ ଶୁଭେ ଏକତାର ଶିରୀ

ଗୀତା-ବେଦ, ମନ୍ତ୍ର-ଶ୍ଳୋକେ କାବ୍ୟ କଲ୍ଲୋଳିନୀ

ସେଇ ମୋର ପୁଣ୍ୟଭୂମି ଉତ୍କଳ ଜନନୀ ।