ସର୍ବହରା
ସର୍ବହରା
ଗୀତ ଶୁଣୁଶୁଣୁ ତୁମକୁ ଭାବିବି
ଗୀତ ଗୁଣୁଗୁଣୁ ପୁଣି ମନେ ପକେଇବି
ଶେଜ ଛାଡିବା ପରେ
ସିନ୍ଦୁରା ଫାଟେ
ଶେଜ ଶୁଙ୍ଘିବା ପରେ
ତୁମ ସ୍ମୃତି ଭାସିଉଠେ ମନ ଲଲାଟେ
ତୁମ ଜଳଛବି ମନ ଆଇନାରେ
ଦିଶିଲା କା ନାହିଁ
ନିରେଖି ରହିବି
ରହିଥିବି ଚାହିଁ
କହିଲ ଦେଖି !
ଜଣେ ମଣିଷ ମୁଁ
ଗୃହସ୍ଥି ଜଞ୍ଜାଳ ଭିତରେ
କେତେ ପ୍ରକାର ନିଶା କରି ପାରିବି ?
ଗଜଲ ଶୁଣୁଶୁଣୁ କଳ୍ପନାରେ ତୁମେ ଆସିବ
ଶାୟରୀ ଗୁଣୁଗୁଣୁ ଜଳ୍ପନାରେ ତୁମେ କାଶିବ
କବିତା ଲେଖୁ ଲେଖୁ ଭାବନାରେ ତୁମେ ଦିଶିବ
ଫୁଲ ତୋଳୁ ତୋଳୁ ସୁରଭିରେ ତୁମେ ବାସିବ
କହିଲ ଦେଖି !
ଗୋଟିଏ ହୃଦୟ ମୋର
ଘର ପରିବାର ସମ୍ଭାଳିବା ଭିତରେ
କେତେ ପ୍ରକାର ନିଶା କରି ପାରିବି ?
ମୁରୁଜ ଆଙ୍କୁ ଆଙ୍କୁ ତୁମେ ଉଙ୍କିମାର
ପରିବା କାଟିବାରେ ତୁମେ ହାତ ଧର
ଭାତ ଚିପିବାରେ ତୁମେ ଭିଡ଼ି ପାର
ସଞ୍ଜ ସଳିତାରେ ତୁମେ ଦିଶିପାର
କହିଲ ଦେଖି !
ଗୋଟିଏ ଆତ୍ମା ମୋର
ଶାଶୁ-ଶଶୁରଙ୍କୁ ସେବା ଭିତରେ
କେତେ ପ୍ରକାର ନିଶା କରି ପାରିବି ?
ଭାବିଛ କି ଥରେ !
ତୁମ ମହୁଲି ନିଶାରେ ଅସରନ୍ତି ମାଦକତା
ତୁମ ନହୁଲି କଥାରେ କାମନା ବାସ୍ତବତା
ତୁମ ପହିଲି ଭାବନାରେ କନ୍ଦର୍ପ କାମୁକତା
ମୋତେ ଶୋଏଇ ଦଉନ ରାତିସାରା
ମୋତେ କାମ କରେଇ ଦଉନ ଦିନସରା
ମୋ ସାଜି ଗଲିଣି
ତୁମ ହରିଣୀ ବିରହିଣୀ ସର୍ବହରା ।।