ସ୍ନାନ ପୂର୍ଣ୍ଣିମା ଓ ସୁନା କୂଅ

ଭକତ ମାନଙ୍କ               ପାଇଁ କାଳିଆରେ

      କେତେ ତୋର ନୂଆ ବେଶ

ସ୍ନାନ ପୂର୍ଣ୍ଣିମାରେ              ଗଜାନନ ବେଶ

        କି ସୁନ୍ଦର ତୋର ରୂପ ।

ଗଣପତି ଭଟ୍ଟ               ଗଜାନନ ବେଶେ

        ଦେଖିବାକୁ ଇଚ୍ଛା କଲା

ସେ ରୂପ ଦର୍ଶନେ             ଅମର ଆତ୍ମାତା

         ବ୍ରହ୍ମରେ ବିଲୀନ ହେଲା ।

କାହିଁ କେତେ ଦୂରୁ             ଆସନ୍ତି ଭକତେ

        ଦେଖିବ ସେ ରୂପ ତୋର

ସୁନା କୂପ ଜଳେ             ସ୍ନାନ ତୋର ହୁଏ

        ଚତୁର୍ଦ୍ଧା ବେଶ ତୋହର ।

ଘଣ୍ଟା ଶଂଙ୍ଖ ବାଜି               ଦୁଲୁକି ଉଠଇ 

         ଶ୍ରୀ ମନ୍ଦିର ଚତୁର୍ଦ୍ଦିଗ

କେତେ ସେବାୟତ          ଲାଗି ଥାନ୍ତି କାର୍ଯେ

        ଭକତେ ହୁଅନ୍ତି ମୁଗ୍ଧ ।

         

ଜ୍ୟେଷ୍ଠ ଶୁକ୍ଳ ପକ୍ଷ               ପୂର୍ଣ୍ଣିମା ତିଥିରେ

         ଭକ୍ତ ମାନ ରକ୍ଷା ପାଇଁ

ଗଜାନନ ବେଶ                 ହୁଅ କଳା ଧଳା

         ସ୍ନାନ ମଣ୍ଡପରେ ଯାଇ ।

ସେହିଦିନ ଠାରୁ                 ଅଣଷର ବିଜେ

         ଭକ୍ତଙ୍କୁ ଦେଖିବା ମନା

ଦଇତା ପତିଙ୍କ                 ହାତେ ପୂଜାପାଅ

          ଉଡାଇ ପତିତ ବାନା ।

ଶହେ ଆଠ ଗରା              ସୁନା କୂଅ ଜଳେ

          ସ୍ନାନ ତୋର କରାଗଲା

ଥଣ୍ଡା ଜଳ ହେତୁ               ଶରୀର ତୋହର

          ରୋଗ ଗ୍ରସ୍ଥ ହୋଇଗଲା ।

         

ଅଣଷର ଘରେ               ସ୍ନାନ ପରେ ଯାଇ

          ଜ୍ଵରରେ ପୀଡିତ ହେଲ

ଫଳ ଆହାରରେ               ବିନା ଭକତରେ

          ସେଠି ଦିନ ବିତାଇଲ ।

ଜ୍ୱର ଉପଶମ                   ପାଇଁ ପଞ୍ଚ ମୂଳି,

           ଦଶ ମୂଳି ଦିଆ ଗଲା

ଫୁଲୁରି ତେଲକୁ                 ମାଲିଶ କରିଣ

           ପୀଡା ଉପଶମ ହେଲା ।

ସ୍ନାନ ପୁର୍ଣିମାରୁ                ନେତ୍ରୋତ୍ସବ ଯାଏ

           ଅଣଷରେ ବିତେ ଦିନ

ଦଇତା ପତି ଯେ               ସେବା କରିଥାନ୍ତି

            ଜାଣି ପ୍ରଭୁଙ୍କର ମନ ।

ନେତ୍ର ଉତ୍ସବରେ                ମନ୍ଦିର ଚୁଡାରେ

           ନେତ ମାନ ବନ୍ଧା ଯାଏ

ଚକ୍ଷୁ ଦାନପାଇ                    ନବ ଯଉବନ

            ଦର୍ଶନ ତୁମର ହୁଏ ।

ଆଷାଢ଼ର ଶୁକ୍ଳ                 ଦ୍ଵିତୀୟା ତିଥିରେ

             ଘୋଷ ଯାତ୍ରା ତୋର ହୁଏ

ଦେଶ ବିଦେଶର                 ଅନେକ ଭକତ

              ରଥରେ ଦର୍ଶନ ପାଏ ।

ଗୋଟିଏ ଭକତ              ପାଇଁ ଗୋଟେ ରୂପ

              ନିଅନ୍ତି କଳାଠାକୁର

ଭାବକୁ ନିକଟ                      ଅଭାବକୁ ଦୂର

              ଇଏତ ତାଙ୍କ ବିଚାର ।

ବାର ମାସେ ତେର                ପୂର୍ଣ୍ଣିମା ପଡଇ

              ପାଳୁଛି ସାରା ଜଗତ

ଭିନ୍ନ ଭିନ୍ନ ରୂପେ                   ପୁଜା ପାଉଅଛ

            ଖୁସି ରହୁ ତୋ ଭକତ ।