ସମୁଦ୍ର
ସମୁଦ୍ର
ଆମ ରାଇଜ ପୂରୂବ ସୀମା
ସମୁଦ୍ର ଯାଏ ଛୁଇଁ
ସୁନ୍ଦର ସେହି ନୀଳ ସମୁଦ୍ର
ସୁନ୍ଦର ବେଳାଭୂଇଁ ।
କୂଳରୁ ତାର ଯେତିକି ଦୂର
ଆଖିକୁ ଯାଏ ଦିଶି
ଲାଗେ ଯେମିତି ପାଣିରେ ତାର
ଆକାଶ ପଡେ ଖସି ।
ସକାଳ ହେଲେ ପାଣିରୁ ତାର
ସୂରୁଯ ଆସେ ଉଇଁ
ନଲି ଆଲୁଅ କଅଁଳ ଖରା
ମନକୁ ନିଏ ମୋହି ।
ସଞ୍ଜ ନଇଁଲେ ପାଣିରେ ପୁଣି
ସୂରୁଯ ଯାଏ ହଜି
ରାତି ପାହିଲେ ସମୁଦ୍ର ନିତି
ଆଣଇ ତାଙ୍କୁ ଖୋଜି ।
ସମୁଦ୍ର ପାଣି ପାଟିକୁ ଲୁଣି
ପାରୁନା ଆମେ ପିଇ
ସେହି ପାଣିରେ ଜାତିଜାତିକା
ଜୀବ ଅଛନ୍ତି ଜୀଇ ।
ମାଛ କଙ୍କଡା କଇଁଛ ସାପ
ରଙ୍ଗ ବେରଙ୍ଗ ପ୍ରାଣୀ
ପାଣି ଭିତରେ ଜୀବନ ତାଙ୍କ
ଦେଖାନ୍ତି କେତେ ଠାଣି ।
ସମୁଦ୍ର ଜଳେ ବିଷ ଜହର
ମିଶୁଛି କେତେ ନିତି
ସେହି ଜହର ଜଳଜୀବଙ୍କ
ଜୀବନ କରେ କ୍ଷତି।
ସମୁଦ୍ର ଜୀବ ଦୁଃଖ ଯାତନା
ଆମକୁ ନୁହେଁ ଭଲ
ତାଙ୍କୁ ନଦେଲେ ସୁରକ୍ଷା ଆମେ
ହେବାରେ କଲବଲ ।