ପ୍ରେମ ବିଡମ୍ବନା
ପ୍ରେମ ବିଡମ୍ବନା
ପ୍ରେମ ପରା ସୀମାହୀନ ଦିଶାହୀନ ସାଗର
ପୁଣି ଆଞ୍ଜୁଳାଏ ପ୍ରେମ
ପୁଣି କାଣିଚାଏ ପ୍ରେମ
ପୁଣି ପାପୁଲିଏ ପ୍ରେମ କ'ଣ ?
ପ୍ରେମ ପରା ଅସରନ୍ତି ନିଳିଆ ଅମ୍ବର
ପୁଣି ପାଛିଆ ଭର୍ତ୍ତି ପ୍ରେମ
ପୁଣି ଗଉଣି ପୂର୍ତ୍ତି ପ୍ରେମ
ପୁଣି ଗାଗରାଭରା ପ୍ରେମ କ'ଣ ?
ପ୍ରେମ ପରା ଅନ୍ଧ ସମର୍ପଣ ହୃଦୟର
ପୁଣି ସର୍ତ୍ତହୀନ ପ୍ରେମ
ପୁଣି ନିଃସର୍ତ୍ତ ପ୍ରେମ
ପୁଣି ସର୍ତ୍ତମୂଳକ ପ୍ରେମ କ'ଣ ?
ପ୍ରେମ ପରା ତ୍ୟାଗ ତିତିକ୍ଷାର ଗନ୍ତାଘର
ପୁଣି କାମନା ଜର୍ଜରିତ ପ୍ରେମ
ପୁଣି ବାସନା ମର୍ମରିତ ପ୍ରେମ
ପୁଣି ରସନା ଅଙ୍କୁରିତ ପ୍ରେମ କ'ଣ ?
ପ୍ରେମ ପରା ଦିବ୍ୟ ଶାଶ୍ଵତ ନିର୍ଝର
ପୁଣି ପଙ୍କିଳ ଆବିଳ ପ୍ରେମ
ପୁଣି ଛବିଳ ପ୍ରଶ୍ନିଳ ପ୍ରେମ
ପୁଣି ପିଚ୍ଛିଳ କଙ୍କରିଳ ପ୍ରେମ କ'ଣ ?
ପ୍ରେମ ପରା ଈଶ୍ଵରୀୟ କୁହୁକ ମହ୍ଲାର
ପୁଣି ଦେହଜ ବିଡିଆ ପ୍ରେମ
ପୁଣି ଶାରୀରିକ ରସିକିଆ ପ୍ରେମ
ପୁଣି କୁକୁରିଆ-ବିରାଡିଆ ପ୍ରେମ କ'ଣ ?
ପ୍ରେମ ପରା ଅପେକ୍ଷା ପ୍ରତୀକ୍ଷାର ଅନ୍ତଃସ୍ଵର
ପୁଣି ପ୍ରତାରଣା ବାଟବଣା ପ୍ରେମ
ପୁଣି ଅନ୍ୟ ନୀଡ଼ ଖୋଜା-ଗଣା ପ୍ରେମ
ପୁଣି ଛାଡ଼ପତ୍ର କଳି-ହଣା ପ୍ରେମ କ'ଣ ?
ପ୍ରେମ ପରା ମନ-ଆତ୍ମାର ମିଳନ ମନ୍ଦିର
ପୁଣି ପଥହୁଡ଼ା ଯାଯାବର ପ୍ରେମ
ପୁଣି ମଦିରା ସେବନଶ୍ଵର ଯେମ
ପୁଣି ଚିରକୁମାର ଏକେଶ୍ଵର ପ୍ରେମ କ'ଣ ?
ପ୍ରେମ ପରା ଆୟତ୍ତ ଆଖିର ଅକୁଲା ଭାଷା
ଗୁଣୁ ଗୁଣୁ ଶୁଭୁଥିବ ରଙ୍ଗରାସ
ଝୁଣୁ ଝୁଣୁ ବାଜୁଥିବ ଖୁସିହସ
ଆଡ଼ରୁଷା ଅଭିମାନ ପରା ନବ ପ୍ରଲେପ
ମାନଭଞ୍ଜନ ପାଇଁ ନିତି ସରସ ପ୍ରୟାସ
ଏ ସବୁର ଅଭାବ ସ୍ଵଭାବ ଅଭିଯୋଗ
ପ୍ରେମିକ-ପ୍ରେମିକା ପ୍ରେମଭଟ୍ଟା ସୁଯୋଗ
ସବୁ ଲାଗେ ପିତା କଷା ଖଟ୍ଟା ରାଗ
ବୋଧହୁଏ ପ୍ରେମ ବିଡମ୍ବନା ବାଗ
ଲାଗୁଛି ଅନ୍ଧାରୀ ଜୀବନ ବିରାଗ ।