ପଚାରିବୁନି

ଅମୁହାଁ ହୃଦୟର ଦରଜା ଡେଇଁ

ଯେବେ ଆସିଥିଲୁ

ଫୁଟିଥିଲା କି ପାଦରେ କିଛି

ଝୁଣ୍ଟିଥିଲୁ କି ତୁ

ମୋ ଚରିତ୍ର ବର୍ଣ୍ଣନାର ଏରୁଣ୍ଡୁରେ

ଶୁଣିଥିଲୁ କି କିଛି ଟାହିଟାପରା

ଶୁଣିଥିଲୁ ଯଦି

କେମିତି ଡେଇଁଲୁ ସେ ବନ୍ଧ

ହୃଦୟର ତରାଜୁକୁ କେତେଥର ତଉଲେଇଛୁ

କହିବୁନି ମୋତେ କେବେ 

ହାଲୁକା ପଟେ ମୁଁ ଥିଲି ବୋଲି।

ତିଥି ବାର ମନେ ନାହିଁ 

ତୁ ଆସିବା ଦିନର

ଯିବାଦିନର ବି ରଖିବିନି

ଭର୍ତ୍ତି ଅଭିମାନର ବେଲୁନଟିକୁ

କେବେ ଫୁଟିବାକୁ ଦେବିନି

ଦୁବଘାସ ଭାବି ତୋ ଇଚ୍ଛାକୁ କାଟିନି

କାହା କଥା ଶୁଣି ବତୁରିଯିବୁ ଯଦି

ସାଉଁଟି ଆଣିବି ମୁଁ

ଥାପି ଥାପି ସଜେଇ ଦେବି

 ତତେ ମୋ ପ୍ରେମରେ

କାହା ପ୍ରରୋଚିତରେ ଭାସିଯିବୁନି

ସେଇ ନଈରେ ଜାଲ ପକାଇ 

ଟାଣି ଆଣିବି ତୋତେ

କିଟମିଟ କଳା ଦୁନିଆରେ

 ତୁ ହଜିବା ପୂର୍ବରୁ

ବତୀଖୁଣ୍ଟ ହୋଇ ଚାଲୁଥିବି 

ତୋ ଆଗେଆଗେ

ଝରିପଡିବୁ ଯେବେ 

କୋଳ ଶୂନ୍ୟ ରଖିଥିବି

ଜହ୍ନ ଯେବେ ବିତୃଷ୍ଣା କରି

 ତୋତେ ଛାଡିଦେବ

ଲାଗିବାକୁ ଦେବେନି 

ତୋ ଦେହେ ତା କଳଙ୍କ

ତାଳ ଲୟ ଭରିଚାଲିଥିବି

ମୋ ପ୍ରେମର ରାଗିଣୀ ଭିତରେ

ବାସ୍ ପଚାରିବୁନି ସେ ସଙ୍ଗୀତର ସାଧନା

କେଉଁଠି ଅଟକିବ।