ମୋ' ମାତୃଭାଷା
ମୋ' ମାତୃଭାଷା
ମୋ ଭାଷା ମୋର ପରିଚୟ
ଅନ୍ତର ତଳର ଆବେଗ
ହୃଦୟ କନ୍ଦର ଭାବାବେଗ
ବ୍ୟକ୍ତ କରିବାରେ ସକ୍ଷମ ସହାୟ ।
ମୋ ମା'ର ଭାଷା ମୋର ବିଜୟ
ଅଫୁରନ୍ତ ଭାବନାର ଉତ୍ସକୂପ
ଅସରନ୍ତି ଚେତନାର ମହାଦୀପ
ବଖାଣିବାରେ ଅତୁଲ୍ୟ ଖୁସି ବଳୟ ।
ମୋ' ମାଟିର ଭାଷା ମୋର ସହାୟ
ଦୟା କରୁଣାରେ ମହନୀୟ
ତ୍ୟାଗ ତୀତିକ୍ଷାରେ ପୂଜନୀୟ
କାଳ ବକ୍ଷରେ ଶିଳାଲେଖ ଅକ୍ଷୟ ।
ମୋ' ମାତୃଭାଷା ମୋର ସ୍ୱର୍ଣ୍ଣିମ ସ୍ଵାକ୍ଷର
ଦେଶପ୍ରେମ ବହ୍ନି ଜଳେଇବାରେ
ଜାତୀୟତାର ବୀଜ ବୁଣିବାରେ
ମଗଜରେ ଦେଶ ମାତୃକାର ଜୟ ଜୟକାର ।
ମୋ' ପ୍ରଦେଶର ଭାଷା ମୋର ଅନ୍ତରାତ୍ମା
ଓଡିଆରେ କଥନ ଲିଖନ ଭାଷଣ
ଗାଳି ଗୁଲଜ କଳି କଜିଆ ସମ୍ଭାଷଣ
ସମସ୍ୟା ବତୁରା ମନକୁ କରିପାରେ ମହାତ୍ମା ।
ମୋ' ଓଡିଆ ଭାଷା ମୋର ବେଉସା
ସଂସ୍କୃତି ପରମ୍ପରା ବାଣ୍ଟିବାରେ
ପରକୁ ଆପଣାର ବାକ୍ୟଗଣ୍ଠିରେ
ସୃଷ୍ଟି କରିପାରେ ଶିଳାମୁଖେ ମୁରୁକି ହସା ।