ମା'ର ଆଗମନୀ
ମା'ର ଆଗମନୀ
ଆସିଲା ଅଶିଣମାସ ଧରାଧାମକୁ ଓହ୍ଲେଇ
ସାଙ୍ଗରେ ଆଣିଛି କେତେ ସରସତା ସେହି ।
କାଶତଣ୍ଡି ହସୁଛି ନଈ ଧାରେ ଧାରେ
ଆସିବେ ଦୁର୍ଗାମାଆ ଏଇ ଧରା ପରେ ।
ସେଥିପାଇଁ ସଜାଉଛି ଧରଣୀ ନିଜକୁ
ସବୁଜ ଓଢ଼ଣୀ ସୋହେ ଧରଣୀର ବୁକୁ ।
ଗଙ୍ଗଶିଉଳିର ହାର ପକାଇଛି ଗଳେ
ଅପରାଜିତା ମନ୍ଦାର ଝୁଲୁଛନ୍ତି ଡାଳେ ।
ଆସିବେ ମହିଷ ମର୍ଦ୍ଦିନୀ ଧରଣୀକୁ ଏବେ
ସାଜଲୋ ଧରଣୀ ରାଣୀ ଏବେ ନାନା ରଙ୍ଗେ ।
ତୁତ ପ୍ରକୃତି ଅଟୁ, ତୋ କଥା ନିଆରା
ମଣିଷ ପଶୁପକ୍ଷୀ ସାଜୁଛନ୍ତି ପରା ।
ଦିନରାତି ଲାଗିଛନ୍ତି କାରିଗର ଭାଇ
ଦେବୀଙ୍କ ମୂରତି ଏବେ ଗଢିବାର ପାଇଁ ।
ଷୋହଳଦିନ ପୂଜା ଲାଗିବ ମାଆର
ଷଷ୍ଠୀ ରୁ ଆରମ୍ଭ ହେବ ମୂର୍ତ୍ତିପୂଜା ତାର ।
ନାନା ଅଳଙ୍କାର ଆଉ ପଟ୍ଟବସ୍ତ୍ର ପିନ୍ଧି
କି ସୁନ୍ଦର ଦିଶୁଅଛି ମାଁଙ୍କ ମୂରତି ।
ସୁନ୍ଦର ସୁନ୍ଦର ମେଢ଼ ସବୁ ମଣ୍ଡପରେ
ତୋରଣରେ ସାଜସଜ୍ଜା ଜନମନ ହରେ ।
ଦୋକାନ ବଜାର ଆଜି ହୋଇଛି ସଜ୍ଜିତ
ସମସ୍ତଙ୍କ ମନ ଆଜି ହୁଏ ପୁଲକିତ ।
ଆଶୀଷ ଢାଳଲୋ ମାଆ ଏ ଦୀନଜନରେ
ତୋପଦେ ପ୍ରଣତି ଢାଳି ସୁଖେ ଦିନ ଯାଉରେ ।