ଲକ୍ଷ୍ମୀ ପୂଜା

ମାଣ ତ ହଜିଛି ଜଗତୀକରଣେ

ଧାନ ଶିଳ୍ପାୟନ ତଳେ

ପରମ୍ପରା ବନ୍ଧା ଆଧୁନିକତାରେ

ଗାଁ ମୋ ସହର ତଳେ l

ଜଟିଳ ଜୀବନୁ ଦୂରେଇ ଗଲାଣି

ମଗୁଶିର ମାଣବସା

ପରମ୍ପରା କଥା ବଖାଣିଲେ ଏଠି

ମିଳେ ଖାଲି ଲୋକହସା l

କି ସୁନ୍ଦର ମାଣେ ଝଟକୁଥିଲା ମୋ

ଗାଁ ମଗୁଶିର ସାରା

ମନ ପୁରୁଥିଲା ଚିତାକୁଟା ମାଣେ

ଦେଖି ଭୋଗର ପସରା l

ଯନ୍ତ୍ର ଦାନବର ନିଷ୍ଠୁର ଆଘାତେ

ମଲା ମାଣ ବୁଣାକାର

ତା ଆଖି ଲୁହର ବନ୍ୟାରେ ଭାସିଲା

ମାଣ ପରମ୍ପରା ମୋର l

ଅଧିଷ୍ଠାତ୍ରୀ ମାତା ଧାନଲକ୍ଷ୍ମୀ ମୋର

ମଣ୍ଡିରେ କାଟୁଛି ଦିନ

ନେତା ମନ୍ତ୍ରୀ ସବୁ ନିଲାମ କଲେଣି

ଧାନ ଧନ ସ୍ୱାଭିମାନ ।

ମାତା ଲକ୍ଷ୍ମୀ ସୂତ ଅଭାବି କୃଷକ

ପାଦରେ ଋଣର ବେଢ଼ି 

ଦିନୁ ଦିନୁ ତାର ଆତ୍ମହତ୍ୟା ସଂଖ୍ୟା

ଧିରେ ଧିରେ ଯାଏ ବଢ଼ି l

ସଡ଼କ ଧାରର ଛୋଟ ଚାଷୀ ବିଲ

ଗାଁ କୁଜିନେତା କିଣି

ଗାଁରେ ସହର ନିର୍ମାଣ କଲାଣି

ଭାରିଯା ନାଁରେ ଭଣି l

ଛୋଟ ଚାଷୀ ସୂତ ପଡୋଶୀ ରାଇଜେ

ଦୁଃଖରେ ଖଟୁଛି ଗୋତି

ବଳିଆ ଭକ୍ତର କାଳିଆ ଯୋଜନା

ପାଲଟିଛି ରାଜନୀତି l

ଉତ୍କଳ ମାଟିର ଲକ୍ଷ୍ମୀ ମାଆ ମୋର

ଆପଣା ଅଣ୍ଟି ପସାରି

ପଞ୍ଚାୟତ ଆଗେ ଚିତ୍କାର କରୁଛି

ହାଅନ୍ନର ରାହା ଧରି l

ଲକ୍ଷ୍ମୀ ସ୍ୱରୁପିଣୀ ତରୁଣୀ ଭଗିନୀ

ବିଧବାର ବେଶଧରି

ଗୁମୁରି କାନ୍ଦୁଛି ନିଶାର୍ଦ୍ଧେ ସ୍ୱାମୀର

ମଦମୃତ୍ୟୁ କଥା ସ୍ମରି l

ଗୃହଲକ୍ଷ୍ମୀ ମୋର ଭାଉଜର ନାହିଁ

ସାମାଜିକ ଅଧିକାର

ପରକୀୟା ପ୍ରୀତି ଯୌତୁକ ରାକ୍ଷସ

ଉଜାଡ଼ିଛି ତା ସଂସାର l

ମାତୃ ଜଠରର କନ୍ୟା ଭ୍ରୁଣେ ନାହିଁ

ବଞ୍ଚିବାର ଅଧିକାର 

କେତେ ଯୁବାଲକ୍ଷ୍ମୀ ସାଜୁଛନ୍ତି ଏଠି

ପ୍ରେମ ଜିହାଦ ଶିକାର l

ଲକ୍ଷ୍ମୀ ପୂଜନର ବୁଣାକାର ମାଣ

ମାଣେ ବସିଥିବା ଧାନ

ଧାନର ଜନକ ଗରିବ କୃଷକ

କୃଷକ ପରାଣ ଧନ l

ପ୍ରାଣପ୍ରୀୟା ପତ୍ନୀ, କନ୍ୟା, ପୁତ୍ରବଧୂ

ସଭିଏ ତ ନିର୍ଯାତିତା

ନିର୍ଯାତିତା ଜନେ କିସୁଖେ ପୂଜିବେ

ଚୀରାରାଧ୍ୟା ଲକ୍ଷ୍ମୀମାତା l

ମାତା ଲକ୍ଷ୍ମୀଙ୍କର ବନ୍ଦାପନା ହେଉ

ବୁଣାକାର ସମୃଦ୍ଧିରେ

ଇଷ୍ଟଦେବୀ ମାଣ ଶୋଭା ପାଉଥାଉ

କୃଷକର ପ୍ରାଚୁର୍ଯ୍ୟରେ l

ଲକ୍ଷ୍ମୀ ପୂଜା ହେଉ ମୋ ମାତୃ ଜାତିର

ପ୍ରେମ, ଭକ୍ତି, ସମାଦରେ

ଜାତି ପ୍ରଗତିର ସ୍ରୋତ ବହିଯାଉ

ମାତା ଲକ୍ଷ୍ମୀ କୃପାଧାରେ l