କଥାରୁ ଆରମ୍ଭ

କଥାରୁ ଆରମ୍ଭ 

ଜୀବନ ସଉଦା 

    କଥା ହେଉ ହେଉ ଶେଷ !

କେତେବେଳେ କଥା 

ଲାଗଇ ଅମୃତ 

    ପୁଣି କେତେବେଳେ ବିଷ !

କଥା ଭରିଦିଏ 

ଜୀବନେ ଫଗୁଣ 

     ଫୁଟାଏ ଯୌବନ ଫୁଲ !

କେଇ ପଦ କଥା 

ଲାଗଇ ଦୁଃସହ 

    ସତେ ଅବା ନିଆଁ ଝୁଲ !

କଥା ଏମିତିକା 

ମନେ ଦିଏ ବ୍ୟଥା 

    ନୟନୁଁ ଲୋତକ ଝରେ !

ଏଇ କଥା ସତେ 

କେତେ ଶକ୍ତିଶାଳୀ 

     ପରବତ ଭାଙ୍ଗିପାରେ !

କା କଥା କନ୍ଦାଏ 

କା କଥା ହସାଏ 

    କଥା ହୁଏ ଆଶାବାଡ଼ି !

ଜୀବନର ଯାତ୍ରା 

 ହୁଅଇ ସୁଗମ 

   କଥା ବାନ୍ଧେ ସ୍ୱର୍ଗ ଶିଢ଼ି !

କଥା ଦେଇଥାଏ 

ଦୁଃଖ ଓ ସଂତାପ 

    କଥାରେ ମିଳେ ଭୂସ୍ବର୍ଗ !

କଥେ କଥେ ଲବ୍ଧ 

ହୁଏ ଶାନ୍ତି ପ୍ରୀତି 

    କଥା ରେ ମିଳେ ସତମାର୍ଗ!

କଥା ରେ ମିଳଇ 

ରାଜଗାଦି ଆଉ 

   ଭଲ କଥା ପାଇଁ ସନମାନ !

କଥା ହିଁ ଅନ୍ୟଥା 

ଭାଙ୍ଗିଦିଏ ମଥା 

    କଥା କରେ ପରିତ୍ରାଣ !

କଥା ପାଇଁ ଶତ୍ରୁ 

ହୋଇପାରେ ମିତ୍ର 

    ପ୍ରେମ ବଢେ ଦୁଇଗୁଣା !

କଥା ଦେଇ ଯିଏ 

 କଥା ରଖେ ନାହିଁ 

    ସେ କି ମଣିଷେ ଗଣା !