କ୍ଷମାକର ଭାବଗ୍ରାହୀ

ଏମିତି ବି ଦିନେ ସମୟ ଆସିବ 

ବୟସର ଅପରାହ୍ନରେ,

ଥୁଣ୍ଟା ଗଛ ପରି ଠିଆ ହୋଇଥିବି 

କେଉଁ ଏକ ରାସ୍ତା କଡରେ !

କାଲି ମୋ ଡାଳରେ କେତେ କଳରବ 

ଶୁଭୁଥିଲା ପକ୍ଷୀଙ୍କର,

ଆଜି ମୋ ପାଖରେ କେହି ଜାଣେ ନାହିଁ 

ଚାଲିଗଲେ ବହୁ ଦୂର !

ଏକାଏକା ଆଜି ଦିନ ମୁଁ ଗଣୁଛି 

କେବେ ଆସିବ ମୋ ପାଳି,

ଆଜି ନ ହେଲେ ମୁଁ କାଲି ଚାଲିଯିବି 

ଏଇ ଦୁନିଆଁକୁ ଛାଡି ?

କେହି ଯିବେ ନାହିଁ ମୋହରି ସାଥିରେ 

ଏକାଏକା ମୁଁ ଯିବି,

କେବଳ କାଳିଆ ଶ୍ରୀରାମ ନାମଙ୍କୁ 

ନେଇ ବାଟ ଚାଲୁଥିବି !

ସଭିଏଁ କହିବେ ଜଣେ କିଏ ଥିଲା 

ଆଜି ସିଏ ଚାଲିଗଲା,

କିଛି ଦେଲା ଅବା କିଛି ବି ନ ଦେଲା 

ନାଁ କିଛି କରିଥିଲା ?

କିଏ ତ କହିବ ଭାରି ଭଲହେଲା 

ସେ ଲୋକଟା ଚାଲିଗଲା,

ଜୀବନଟା ସାରା ଅହଂକାରୀ ହୋଇ 

କି ଲାଭ ଅବା ପାଇଲା ?

ଯେତେ ପରଛିଦ୍ର ନିନ୍ଦା ଅପବାଦ 

ଜୀବନଟା ଯାକ କରି,

ଆଜି ହୋଇଗଲା ବିରାଡି ବୈଷ୍ଣବ 

ଧର୍ମ ନାମେ ହେବ ପାରି ?

ଅଧର୍ମ ଯେତେକ ପୁଣି ଅପକର୍ମ 

ସାରା ଜୀବନ ତ କଲା,

ଆଜି ଚାଲିଗଲା ଭାରି ଭଲ ହେଲା 

ଧର୍ମ ରକ୍ଷା ହୋଇଗଲା !

ସେଇ ଥୁଣ୍ଡା ଗଛ ଅଣ୍ଟା ଭାଙ୍ଗି ଆଜି 

ପଡିଛି ଆହତ ହୋଇ,

ଚନ୍ଦ୍ରକାନ୍ତ ମାଗେ ପାପ ମୋର 

ତୁମେ ଧୋଇଦିଅ ଭାବଗ୍ରାହୀ !