କଲି ଜୁଗର ଚଉତିଶା କବି-କ୍ଷୀରୋଦ୍ର କୁମାର ସାହୁ

          କଲିଯୁଗର୍ ଚଉତିସା

ଅଏନ କଥା ଦୂରା କହୁଛେ ବାବୁ ସୁନ । 

ଅସାର କଥା ନୁହେଁ ଇତାର୍ ଅଛେ ଗୁନ୍ || 

ଆଝିର୍ ମୁନୁସ୍ ରେ ବାବୁ କାଲ୍‌କେ ନାଇ ।

ଆସା କଲା କଥା ଘେ ଜିବା ପାଏନ୍ ହେଇ ॥ 

ଇଠାନୁ ଜନମ୍ ହେଲା ଇନ କିମା ମରି । 

ଇତାର ସେତାର କଥା ଥିମା କାଁଜେ ଭାଲି ॥ 

ଇଛନ୍ ଅଛୁ ବାବୁ ଆର ଛନେକେ ନାଇଁ । 

ଇସପର ମାହାପୁରୁ ନାଁ କେ ଥିମା ଗାଇ ॥ 

ଉସତ୍ ହେଇକରି ଧରଲେ ତାକର ନାଁ । 

ଉଏନ କରି ରଖିବେ ହେବେ ବାବୁ ସାହା ।। 

ଉପାସ୍ ଜାଗର୍ କରୁ ଅଛୁ ତୁଇ କେତେ । 

ଉନଝା କଥାକେ ବାବୁ ନି ଭାଲ୍‌ବୁ ସତେ ॥ 

ଋସି ମୁନି ମାନେ କହିଛନ୍ ଜେନ୍ କଥା ।

ରୁସାଫୁଲା ନୁହେଁ ସେ ପରଛା ସତ୍ କଥା ||

ଏକଲା ଆଇଛୁ ବାବୁ ଏକଲା ନ ଜିବୁ ।

ଏଖା ମାହାପୁରୁ ନାଁ କେ ତୁଇ ଧରିଥିବୁ I

ଏଇଛେନ ବାବୁ ଇଟା କୁଆନ ସମିଆଁ ।

 ଇହାଦେନୁ ଧରୁଥାନ ମାହାପୁରୁର ନାଁ ॥

 ଓ କରିବେ ବାବୁ ତୁଇ କରିଥୁବୁ ଲଏ ।

ଓମକାର ସେ ତତେ କରିବେ କିଏ ଜଏ ||

ଅଉଛେନ ସମିଆଁ ଦେଖୁଥାରେ ବାବୁ । 

ଅଉସଧ ବାଗିର ନାଁ କେ ଧରିଥବୁ | 

କହୁଁଛେ ବାବୁରେ ତୁଇ ସୁନ୍ କାନଡେରି । 

କଲିଯୁଗର ଚଉତିସା ଭାସା କୋସଲି ॥

ଖଚମିଚ କପଟ କଥା କର ଧୁରିଆ ।

ଖଟି ଖଟି କରି ବାବୁ ତୁଇ ହ କମିହାଁ ॥

ଗରବ ଅହଁକାର କଥା ଇନ ଜେ କଲା । 

ଗେଜୋ ନାଇରହେ ସେ ର୍ଜି ଥାଇକରି ମଲା || 

ଘର ବନାଉଛୁ ତୁଇ ଇଆଡେ ସେଆଡେ । 

ଘିଚା ଟନା ହେବେ ବାବୁ ତୁଇ ମରିଗଲେ । 

ଉଆଁସ ରାଏତ୍ ଫାଟେ ଜଲଲେ ଡିବିରି । 

ଉକିଆ ଦେ ବାବୁ ନିଜେ ତୁଇ ଜଲିକରି ॥ 

ଚେତିକରି ଥାରେ ବାବୁ ଲଗାତୋର୍ ମନ । 

ଚୋର ବୃହିନେବେ ତୋର ସବୁ ଜେତେ ଧନ ॥

ଛନ୍ଦ କପଟ ମୁଁ ରହ ଧୁରିଆ ତର୍କି । 

ଛିନା ଦେଖୁ ଘିଚି ନେବା ନାଇଁ ପାରୁ ଡାକି ॥ 

ଜିବନ ଟା ଦୁଇଦିନ ନାଇଁକର ଟାନ । 

ଜଂଜାଲ୍ ଜାଲେ ରହେଲେ ଭାଙ୍ଗିକିବା ମାନ ॥

ଝଲକା ଗଠିଆ କାନ ଫସିଆ ବନାବୁ ।

ଝନେ କିହେ ନାଇଁ ନେଇଁ ଇକଥା ଜାନବୁ ॥

ନିତିନିଅମ୍ ମାନିକରି ତୁଲ ଚଲୁଥା । 

ନିଏ ଅନିଏ କଥା ବାବୁ ସୋର୍ କରିଥା || 

ଟେକ ଟାନ କଥା ବାବୁ ଜଦି ତୁଲ କଲୁ । 

ଟେକ ଟାନ ଭାଙ୍ଗି ଦେବେ ସତେ ମାହାପୁରୁ || 

ଠକି ଠକି କରି ତୁଇ କେତେ ଦିନ୍ ଜିବୁ । 

ଠକେ ଦିନେ ପଡିଜିବୁ ସତେ ତୁଇ ବାବୁ ॥

 ଡରେଇ ଧୁପେଇ କରି ବାବୁଜେ ଖାଏଲେ । 

ଡେବରି ହାତେ ଜିବା ଭୁଜନି ଥି ଆଏଲେ I 

ଢ଼ମ୍‌ପନ କରି କଥା କହୁଥିଲେ ବାବୁ । 

ଢ଼େକେଲ୍ ପଖନ୍ ମନେ ଏଖା ତ ପାଏବୁ | 

ନାଇ କର ରୁସାଫୁଲା ନାଇକର ଟାନ । 

ନାଇ ରହେ ଟେକ ଟାନ ଥିସିଖାଲି ମାନ I 

ତଲ୍ ବରଡା ଖସୁଛେ ଉପର ହଁସୁଛେ ।

ତରିଜିବା ଳେ ମାହାପୁରୁର ନାଁ ଧରୁଛେ I

ଥଏ କର ଚିତ ଗା ଥଏ କର୍ ମନ । 

ଥରେକେ ନାଇଁ ମିଲେ ତ ହଜିଗଲା ଧନ ॥

ଦମ୍ କରି କରି ବାବୁ ଜଦି ଥୁବୁ ତୁଇ ।

ଦଜା, ଖେମା, ସତ, ସାନତି ଚାରି ଜିବୁ ପାଇ ।। 

ଧନ୍ଦି ହେଉଛୁରେ ବାବୁ ଧନ ଧନ ବଲି । 

ଧନ ପଲେଇ ଜିବା ମରବୁ ଭାଲି ଭାଲି ॥ 

ନାଇ ହେଲା କଥା କେ ସତ ନାଇ କରିବୁ । 

ନରଦି ନରଦି କରି କାଁହେଲେ ମରବୁ ।।

ପରର କଥାକେ ବାବୁ କେଭେ ନି ଧରବୁ। 

ପସତଉଥିବୁ ପଛେ ଇକଥା କାନବୁ | 

ଫଲ ଫଲସି ଗା ବାବୁ ତାର ଠିକ୍‌ସୁରେ । 

ଫଲ ଭଲ ପାଏବୁ ଭଲକାମ କଲେ ॥ 

ବନେ କାମ କଲେ ଗା ବନେ ଫଲ ପାଏବୁ ।

ବଦମାସ କାମ କଲେ ବଦ୍‌ନାମ ହେବୁ ॥

ଭଲ କାମ କର ବାବୁ ସତ୍ କଥା କହ ।

ଭଗବାନ୍ ତତେ ଭଲ ପାଏବେ ଗା ଜହ II

ମନ କେ କର ଟାନ୍ ଚିତ୍ କେ କର ଥଏ ।

ମାହାପୁରୁ ସଦାବେଲେ କରିବେ ତ ଜଏ ।।

ରାମ ରାମ ବଲ ବାବୁ ଭବୁ ଜିବୁ ତରି ।

ରାମ ନାମ୍ ତ ଆଏ ଜମର ଅଏରି ॥

ଲଏଖନ୍ ଜେନ୍ତା ଭଜୁଥିଲେ ରାମ ରାମ । 

ଲଖମି ଆଏବେ ବାବୁ କଲେ ବନେ କାମ ॥ 

ସତ କଥା ଇଟା ବାବୁ ସୁରତା ତ କର ।

ସତ କଥା ସୁନ ବଲି ଲେଖେ ଖୀରୋଦର ॥ 

ହରି ନାଁ କେ ବାବୁ ସବେ କରିଥିଲେ ଲଏ । 

ହରି ନେବେ ସବୁ ଦୁଖ୍ ହେବା କଏ ହୁଏ ।