କହି ଦେଉଥାଏ ପରକୁ

କହିବା ଅଭ୍ୟାସ ଜନ୍ମରୁ ମୋହର

କହିବାକୁ କିଆଁ ଡରିବି

ବିବେକ ରହିତ କଥା ମୁଇଁ କୁହେ

କହି କହି ପ୍ରାଣ ଛାଡ଼ିବି l

ପର ମନ୍ଦ ଚର୍ଚ୍ଚା ଲାଗେ ଭାରି ମଜା

ନିଜ କଥା ଦୀପ ଅନ୍ଧାର

ଚାଲୁଣି ଖୋଜୁଛି  ଗୁଣ ବଖାଣୁଛି

କଣାଟିଏ ଅଛି ଛୁଞ୍ଚିର l

ମାଆଟି ମୋହର ଜରାଶ୍ରମେ ଅଛି

ରଘୁଆ ମାଆକୁ ପିଟୁଛି

କେତେ ସେ ନିଷ୍ଠୁର ନାହିଁ ମମତାର

ତା କଥା ବାହାରେ ଗପୁଛି l

ନିଜର ଭାଇକୁ କରି ବିତାଡିତ

ଏକ ଛତ୍ରପତି ହୋଇଛି

ରାମ ଦାମ ଭାଇ କଳିକି ବଖାଣି

ମୁଖେ ଲାଜ ନାହିଁ କହୁଛି l

ଝିଅଟି ମୋହର ଗେଲ ବରସର

ତୃତୀୟ ବିବାହ ଦେଇଛି

ମଦନା ଝିଅଟି ଶାଶୁ ଘରେ ନାହିଁ

ଚରିତ୍ର ଚିତ୍ରଣ କରୁଛି l

ମୋର ଧନ ସୁନା ଅମୁଲ ମୂଲଯେ

ଅନ୍ୟର ଧନ ଭୁତ ଖିଆ

ପରର ତେଲରେ ଚିଲିକା ପହଁରେ

ନିଜର ଧନେ ଏକୁଟିଆ l

ଅଫିସର ହୋଇ ମଦ ପିଉଅଛି

ମୋ ପାଇଁ ନିୟମ ଲାଗେନା

ମଦୁଆ ବାତେରା ଗୋଡ଼ାଇ ଧରୁଛି

ଆଇନିର ଛାଟ ଧରିନା l

ମାଷ୍ଟର ହୋଇ କି ପଢାଉନି ମୁଇଁ

ମଧୁର ବଚନ କହୁଛି

ତୁମର ପୁଅଟା ଭଲ ପଢିବ ଯେ

କୋଚିଙ୍ଗ ତାକୁ ଦିଅ ଯାଇ l

ପେନସନ ମୋର ସତୁରୀ ହଜାର

ବଢିବା ପାଇଁ ଯେ ଲାଗିଛି

ଧନ୍ୟ ସରକାର ବଢିଆ ବିଚାର

ଭତ୍ତାକୁ ଉଠାଇ ଦେଇଛି l

ବାପା ବିପିଏଲ ନାମରେ ପାଇଛି

ତିନୋଟି ଇନ୍ଦିରା ଆବାସ

ପୁଅଟା ତୁମର କମ୍ପାନୀ ଚାକର

ମିଳିବନି ତୁମ ଆବାସ l

ଅନ୍ୟକୁ କହିବା କଟାକ୍ଷ କରିବା

ଅଭ୍ୟାସରେ ପଡି ଯାଇଛି

ନିଜର ଇଜ୍ଜତ ଦାଣ୍ଡରେ ନିଲାମ

ନ ଦେଖି ଅନ୍ୟକୁ କହୁଛି ।