କାର୍ତ୍ତିକ ସୋମବାର

ମହା ପୁଣ୍ୟ କାର୍ତ୍ତିକ ଆସ ଲୋ

        ଯିବା ଆମେ ଶିବ ମନ୍ଦିର

ତୁଣ୍ଡେ ଉଚାରି ଯିବା ଆସ ଲୋ

        ଗାଇ ଯିବା ପଞ୍ଚାକ୍ଷର ।

ଭୋଳା ବାବା କରି ଦେବେ କରୁଣା 

ଶ୍ରଦ୍ଧାରେ ପୁଜିବା କରନା ମନ ଉଣା

ଧନୀ ଗରିବ ସେ ଦେଖିବେନି କିଛି

ମନ ଦେଖିବେ ମହେଶ ଭକ୍ତି ତୋ ଅଛି ।

ପ୍ରଭାତ ବେଳାରେ ଯିବା ଆସ ଲୋ 

       ଆକାଶୁ ଝରେ କାକର

ପବିତ୍ର ଭାବରେ ଆମେ ଯିବା ଲୋ

       ହାତେ ଧରି ଗଙ୍ଗା ନୀର ।

ଭକ୍ତ ଙ୍କ ସଙ୍ଗାତେ ଆସ ମିଶି ଯିବା

ଶିବ ଙ୍କ ଚରଣେ ଦୁଃଖ ଜଣାଇବା

ଅନାଥଙ୍କ ସାହା ହେବେ ତ୍ରିଲୋଚନ

ଜାଳି ଦେବା ଦୀପ ଦୁଃଖ ହେବ ମୋଚନ ।

ଅଭାବ ଜୀବନେ ଦେଖି ଯିବା ଲୋ

         ଶିବ ହିଁ ତ ଓଁ କାର

ଶିବ ଙ୍କ ବିନା କିଏ ଆମର ଲୋ

          ମିଛ ଏ ସାରା ସଂସାର ।