ଗୁମର ଖୋଲିବି କି ?

ସିଧାକଥା-୩୦

ବୁଲେଇ ବଙ୍କେଇ କହିବି କାହିଁକି କହୁଛି ମୁଁ ସିଧାକଥା ,

ଅକୁହା କଥାକୁ କହିଦେଲେ କାଳେ କମିଯିବ ଟିକେ ବ୍ୟଥା ।

ବୁଢ଼ିଛେଳି ଯେତେ କଟା ହେବାପରେ ବିକିଦେଉ କହି ଖାସି,

ମୂଲିଆ ହଳିଆ ଦଲାଲ କହନ୍ତି ଆମେ ହିଁ ଅସଲ ଚାଷୀ ।

ସବୁଜ ପରିବା ପାଚିଲା କଦଳୀ ସବୁମିଳେ ରଙ୍ଗଦିଆ,

ନକିଲି ଔଷଧ ଭେଜାଲ ସଉଦା କମ୍ପାନୀ ତ କପଟିଆ ।

ପାଠ ପଢ଼ିସାରି ଚାକିରୀ ନ ପାଇ ଶିକ୍ଷକତା କଲା ଯିଏ,

କିଛି ନ ହେଲେ ବି ଅବସର ପରେ ଶିକ୍ଷାବିତ ହୁଏ ସିଏ ।

ଅକ୍ଷର ଚିହ୍ନେନା ଦନେଇଁର ମାଆ ସରପଞ୍ଚ ହୋଇଗଲା,

ଆମ ଗାଁ' ମାଧିଆ ସମିତିର ସଭ୍ୟ ଶୁଖୁଆ ବେପାରୀ ଥିଲା ।

ଦେଶକୁ ଲୁଟନ୍ତି ଆମ ରାଜନେତା କିଣନ୍ତି ଭୋଅଟ ଯେତେ,

ଗୋଦରା ଗୋଡ଼ିଆ ଯନ୍ତ୍ରୀ ଅଫିସର କୋଡ଼େ ଯେତେ ମାଡ଼େ ସେତେ ।

ତେଲ ତ ନକିଲି ପାଣି ବି ନକିଲି, ନକିଲି ଦୋକାନ ବିଷ,

ଆମରି ବିଲରେ ଫସଲଠୁଁ ବେଶି ହେଉଛି ଗଞ୍ଜେଇ ଚାଷ ।

ଧନୀଲୋକ ପାଇଁ ସବୁ ତ ଅଭାବ ଗୁମର ଖୋଲିବି ନାହିଁ,

ଗରିବ କହୁଛି ବଢିଆ ଚାଲିଛି ଦେଶର ମାଲିକ ମୁହିଁ ।

#ସିଧାକଥା