Library
Profile
ଏମିତି ଏକ ମିଳନ୍ତା ସାଥୀ
ଏମିତି ଏକ ମିଳନ୍ତା ସାଥୀ
ଖୋଜୁଛି ଏକ ଦରଦୀ ସାଥୀ
ହଜାଇ ଦେଇ ଛାତିରୁ ତାତି
ଭିଜା ନୟନ ପୋଛି;
ମନ ଗହନ ଅକୁହା କଥା
ବୁଝି ହରନ୍ତା ଅନ୍ତର ବ୍ୟଥା
ଲଭନ୍ତି ଶାନ୍ତି କିଛି ।। (୧)
ଏମିତି ଏକ ମିଳନ୍ତା ସାଥୀ
କରନ୍ତା ଦୂର ମନରୁ ଭ୍ରାନ୍ତି
ଜୀବନେ ସାଜି ଫୁଲ;
ସ୍ନେହ ସରାଗେ ହସନ୍ତି ଲୋଟି
ଆପଣା ପଣ ଦିଅନ୍ତି ଭେଟି
ପାଆନ୍ତି ଅମୂଲ ମୂଲ ।। (୨)
ପରିବାରରୁ ସମାଜ ଯାଏଁ
ଅନ୍ତରତମ ସାଥୀ ନ ପାଏ
ଭାଗ ନେବାକୁ ଦୁଃଖ;
ବେଦନା ସିକ୍ତ ପରାଣ କାନ୍ଦେ
ସୁନା ପଞ୍ଜୁରି ସଂସାର ବାନ୍ଧେ
ତଥାପି ଖୋଜେ ସୁଖ ।। (୩)
ହୃଦୟତନ୍ତ୍ରୀ ଝଙ୍କାର ତୋଳି
ବାଜି ଉଠନ୍ତା ମମତା ବୋଳି
ହେଲେ ସେ ଆପଣାର;
ନିରାଶା ଯେତେ ଯାଆନ୍ତା ଚାଲି
ଜୈତ୍ର ନାଦ କରନ୍ତି ଖାଲି
ଏ ବିଶ୍ୱ ପରିବାର ।। (୪)
ସକଳ ଆଶା ମୋ ପ୍ରଶ୍ନବାଚୀ
ମିଳେନା ସାଥୀ ପାଏନା ସୂଚୀ
ଦେବ କି କେହି ଖୋଜି;
ଭାବନା ଭରା ହୃଦ କନ୍ଦରେ
କରନ୍ତି ପୂଜା ମନ ମନ୍ଦିରେ
ପରାଣ ରଖି ବାଜି ।। (୫)
ଏକଇ ସାଥୀ ସୁଖ ଦୁଃଖର
ସେହି ତ ସତ୍ୟ ଶିବ ସୁନ୍ଦର
ଦିଏନା ଦେଖା କେବେ;
ଦିବ୍ୟ ଚେତନା ମନେ ମୋ ଜାଗେ
ନାହିଁ ସେ କାହିଁ କେଉଁ ସରଗେ
ମିଳେ ତିତିକ୍ଷା ଭାବେ ।। (୬)
