Library
ଚାରିଆଡ଼େ ସଜବାଜ
ଚାରିଆଡ଼େ ସଜବାଜ
ନୂଆ ବର୍ଷ ଆସିବ ଆସିବ ବୋଲି
ଚାରିଆଡ଼େ ସଜବାଜ
ବନ୍ଧୁମିଳନ ବଣଭୋଜିରେ ବ୍ୟସ୍ତ ବୋଲି
ଗୃପ୍ ଫଟୋରେ ଅବାଜ ।
କିଛି ଫରକ୍ ହେବ କି ଅର୍ବାଚୀନ ?
ଗତକାଲିର ଅଭୂଲା ଇସ୍ତାହାର
ବର୍ତ୍ତମାନର ଲେଲିହାନ ହାହାକାର
ଆସନ୍ତାକାଲିର ଲମ୍ବାଳିଆ ଅନ୍ଧାର
ନୂଆ ବର୍ଷର ରଙ୍ଗୋଲିରେ
ନୂଆ ଆଶା ଉଦ୍ଦିପନାରେ
ଜିରୋ ନାଇଟରେ
ନିଅନ୍ ଲାଇଟରେ
ମଟନ୍ ବିରିୟାନୀରେ
ମୋତେ କାହିଁ ଲାଗୁଛି ସନ୍ଦିହାନ ?
କହି ପାରିବ କି
ନୂଆ ବର୍ଷ ଫେରେଇ ପାରିବ କି
ମାଟି ତଳେ କଙ୍କାଳ ସାଜିଥିବା
ଭଉଣୀମାନଙ୍କର ରକ୍ତ ମାଂସର
କ୍ଷତାକ୍ତ ଶରୀର ?
ଉତ୍ତର ମିଳିବ କି
ନୂଆ ବର୍ଷ ଠିଆ କରେଇ ପାରିବ କି
ଦୁର୍ଘଟଣାରେ ନିତି ହାରୁଥିବା
ଭାଇମାନଙ୍କର ହାତ ଗୋଡ଼
ଖଣ୍ଡ ବିଖଣ୍ଡିତ ଅସ୍ଥି ପଞ୍ଜର ?
ଜବାବ ମିଳିବ କି
ନୂଆ ବର୍ଷ ଲଗେଇ ପାରିବ କି
ମାନବିକତାର ଚାରା ଟେ
ମଣିଷର ଅନ୍ତରାତ୍ମାରେ
ସବୁଜିମା ଲହର ?
ଶୁଣାଇ ପାରିବ କି
ନୂଆ ବର୍ଷ ଯୋଡି ପାରିବ କି
ଭିନ୍ନେ ହୋଇ ଚଳୁଥିବା
ଏକ ମା'ର ସନ୍ତାନମାନଙ୍କୁ
ପିଏଇ କିଛି ପୀଯୁଷ ଅମୃତର ?
ନେପଥ୍ୟରେ କୋଳାହଳ ପ୍ରାୟ
ସ୍ଵାଗତ ପର୍ବ ପାଳନ
ଅପ୍ରାପ୍ତିର ଆନନ୍ଦରେ ମତୁଆଲା
ଉନ୍ମାଦର ନିନାଦ ଗାନ
ମଉଜର ଫଉଜ ଆଜି ସୁରା
ସାକି ମାତାଲ୍ ବୋବାଲ୍
ନୂଆ ବର୍ଷ ଖାଲି ବାହାନା ବାଜି
ଦୁଃଖ ଭୁଲିବାର ନୂଆ ବୋତଲ ।
