ବନ୍ଧୁ

ଏମ୍. ହିମାଂଶୁ ଆଚାରୀ

କେମିତି ଏ ଭାବ କେମିତି ବନ୍ଧନ ହୃଦୟର ପରିଭାଷା

ମନଗହନର ଗହଳି ଭିତରେ ଖୋଜୁଥାଏ ଟିକେ ଆଶା,

ଜାତି ଧର୍ମ ବର୍ଣ୍ଣ ଭେଦଭାବ ଠାରୁ ଆକାଶେ ଉଚ୍ଚରେ ଥାଏ

ସଂପର୍କ ସେତୁର ସୁନା ଛାଉଣିରେ ସୁଖର ସ୍ତମ୍ଭଟିଏ !

ଶୀତ ସଂଜର ଶୀତଳତା ପରି ଘନ କୁହୁଡିର ହସ,

ହୃଦୟ ଦ୍ଵୟର ମିଳନ ସ୍ଥଳରେ ସତେ ଅବା ପ୍ରେମ ଶୋଷ

ଅଳି ଅଝଟର ଅମୃତ ବେଳାରେ ଉଇଁଛି ଅନେକ ମାନ,

ବିଶ୍ଵାସର ସେଇ ବନ୍ଧନୀ ଭିତରେ ଲୁଚୁଥାଏ ଅଭିମାନ !

ମଧୁର ଇଛାର ମହୋଦଧିରେ ତ ଖେଳୁଥାଏ ନିତି ଢେଉ

ପ୍ରାପ୍ତି ଅପ୍ରାପ୍ତିର ଗଣିତ କଷାରେ ଭାଗଶେଷଟିଏ ଥାଉ,

ଲୁହର ନଈଟି କେବେ ବି ନଛୁଉଁ ସଂପର୍କର ଦ୍ବାର ଦେଶେ

ଭଲ ପାଇବାର ଭାଲେରି ପାହାଡ ଦିଶୁ ସଦା ମନ ପାଶେ !

ବନ୍ଧନର ଏଇ ବନ୍ଦିଶାଳାରେ ବାନ୍ଧି ରହୁ ବନ୍ଧୁ ଭାବ,

ଜନ୍ମ ଜନ୍ମାନ୍ତରେ ଜୀଉଁ ଏ ଜୀବନ ଘୁଞ୍ଚିଯାଉ ପରାଭବ !

ଶିବାଜୀ ନଗର, ଉମରକୋଟ, ନବରଂଗପୁର ।।