ବିଶ୍ଳେଷଣ

ୠତୁସ୍ନାତା ନାରୀ ପାଇଁ

ରତି କ୍ରୀଡ଼ା ମନା

ଖାସ୍ ସେଇଥି ପାଇଁକି

ସେଦିନ, ଦୁଃଶାସନ

କୁରୁସଭାରେ ପାଞ୍ଚାଳୀକୁ

କଲେ ବିବସନା ?

କେମିତି ଏ ବିଧି,ବିଧାନ,ସଂବିଧାନ

କେଉଁ ନ୍ୟାୟରେ ନୀରବିତ

ପଞ୍ଚ ଭ୍ରାତା ପଣ୍ଡୁଙ୍କ ନନ୍ଦନ ।

ଚାହିଁ ଥିଲେ ପାରିଥାନ୍ତେ କୌରବେ

ରତିକ୍ଳାନ୍ତ କରି

ଅବା ଦାସୀ ପଣେ,

ସଭାର ଅପ୍ସରୀ ।

ନତୁବା;

ଦ୍ରୌପଦୀଙ୍କ ଉନ୍ମୁକ୍ତ ଯୌବନ

ପାରିଥାନ୍ତେ ଦେଖି

ଜଣ ଜଣ କରି

ନିବୁଜ କୋଠରିରେ

ଏକା ଦୁର୍ଯ୍ୟୋଧନ

ଏକା ଦୁଃଶାସନ ।

ଏଇ କିବା ନ୍ୟାୟ ?

କେମିତି ସହିଲେ ସତେ

ଦ୍ରୌପଦୀଙ୍କ ମାନସ ପତି

ଅଜେୟ ରାଧେୟ ।

ଅଜଣା କି ଥିଲେ ରାଜ ପୁତ୍ରେ

ନାରୀ ପାଇଁ ସତୀ ଠାରୁ ଲଜ୍ଜା ବଡ଼

ଜୀବନଠୁ ବଡ଼ ଯୌବନ

କ୍ଷମା ନାହିଁ କ୍ଷମା ନାହିଁ

ପତି, ପିତା,ପୁତ୍ର,ଭ୍ରାତା

ଯିଏ କରେ ଉଲ୍ଲଂଘନ ।

କୌରବ ପାଣ୍ଡବ ପରି

ହେବେ ସବୁ ଲୀନ

ଚାହିଁଚି କାଳର ଶକ୍ତ

ଶାଣିତ କୃପାଣ ।