ବିଚିତ୍ର ବିଡ଼ମ୍ବନା

ମଣିଷ ଲାଗେ ବିଚିତ୍ର ପ୍ରାଣୀ

ବିଚରା ହସେ ବି ରୋଷେ ବି

ବିଚରା ହସାଏ ବି କନ୍ଦାଏ ବି

ମିଶ୍ରିତ ଚିତ୍ରିତ ତା'ର କଥା କାହାଣୀ |

ଯେବେ ମୁଣ୍ଡରେ ନ ଉଠେ ଚୂଳ

 ଔଷଧ ଖୋଜେ

ଯେବେ କାଳିଆ ବାଳ ଗହଳେ ଓହଳେ

ନାପିତ ଖୋଜେ

ଯେବେ ଛନଛନିଆ ମଚମଚିଆ 

କଳାଭଉଁରିଆ ଶୋଭେ ମଥାନରେ

ମାଇପ ଖୋଜେ

ଆଉ ଯେବେ ଧଳା ଧୋବଳିଆ ଦିଶେ ଚୂଳ

ରଙ୍ଗ/ଡାଇ ଖୋଜେ ।

ବିଚିତ୍ର ବିଡମ୍ବନା ଏଠି

ଯତ୍ର ତତ୍ର ସର୍ବତ୍ର

ଚିନ୍ତନ ବଚନ କଥନରେ 

ତାଳମେଳ କାହିଁ

କଳହ ଅହୋରାତ୍ର ।

ମଣିଷ ବାପୁଡ଼ା ଜନ୍ମରୁ ଖାଲିପାଦ

ଗୁରୁଣ୍ଡିଲା ପେଟେଇଲା ଧିରେ

ଥୁକୁଲ୍ ଥାକୁଲ୍ ପାହୁଣ୍ଡ ପକେଇ

 ଘର ବାରଣ୍ଡା ହୁଲସ୍ତୁଲ ସାରେ 

ବୟସ ବଢିଲା ଚାଲିଲା ଦୌଡିଲା

ଖାଲିପାଦ ହେଲା କ୍ଷତାକ୍ତ

ଚପଲ ପିନ୍ଧିଲା ଜୋତା ଖୋଜିଲା

ଘରେ ବାହାରେ ଭତ୍ପାତ ।

ପାଇଖାନାରୁ ପାର୍ଲିୟାମେଣ୍ଟ

ପାଦୁକା ପାଦତଳେ ଶୋଭିଲା

ଖାଲି ପାଦରେ ବିଣ୍ଡି ଫଟା ନୋଳା

ଶିତ ଦିନେ ରକ୍ତ ଝରିଲା ।

ବଇଦ କହିଲେ ବିଚିତ୍ର ଉପଚାର

ଖାଲି ପାଦରେ ଚାଲ

କାକରିଆ ଦୁବ ଉପରେ ଚାଲ

ଗହଳ ଦୁର୍ବାଦଳ ଗାଲିଚାରେ ମୃଦୁ ପଦପାତ

ରୁକ୍ଷ ଫଟା ପାଦ ପୁଣି କଅଁଳିବ ପଦ୍ମପାଦ ।

ବିଚିତ୍ର ବିଡମ୍ବନା ଆମର

ବାଣୀ - ତର୍କ- ତତ୍ତ୍ଵର ତାଳେ

କୋମଳ କହିବାକୁ ଭାବୁ ଭାବୁ

ବାହାରି ପଡ଼େ ଛାଡିଫଟା ତିରସ୍କାର ହଳେ ।