ଭକ୍ତିପୁଷ୍ପ-୨୮

ଧରଣୀ , ଘରଣୀ 

ଯିବାରୁ ରଜନୀ

ଚଞ୍ଚଳା ଚଞ୍ଚଳ ସଖି ହେଲେଣି ,

ମଦନ , ଗୋ-ଧନ

ଗୋପି , ତପି , ଜନ

ଯମୁନା କୂଳକୁ ସର୍ବେ ଗଲେଣି ।

ଯାମିନୀ , କାମିନୀ

କାମନାକୁ ଘେନି

କାମଦେବ ସନ୍ନିକଟେ ଗଲେଣି ,

ଯମୁନା ଯାତନା

ଭୁଲି ଗଲା ସିନା

କହ୍ନେଇ ତା'କୂଳେ ଠିଆ ହେବେଣି ।

ଶ୍ରୀମତି , ସୁମତି

ଅନୂଢ଼ା ସୁକାନ୍ତି

ପଡ଼ୋଶୀ ଷୋଡ଼ଶୀ ରୁଣ୍ଡ ହେଲେଣି ,

ଲଳିତା , ବିଶାଖା

ନାହିଁ ତୁମ ଦେଖା

ଅଳସୀ କଳସୀ କାଖେ ନେଲେଣି ।

ଗୋପାଳ ଓଗାଳ

ଗାଏ ହୋଇ ଭୋଳ

ମଧୁର ମୁରଲୀ ସ୍ବର ଶୁଭୁନି ,

ଗହଳ ଚହଳ

କଦମ୍ବର ମୂଳ

ଡହଳ ବିକଳ ମନ ହେଲାଣି ।

ସହଳ ସହଳ

ଆସଲୋ ବଉଳ

ବଉଳା ବାଛୁରୀ ଧରି ସାଥିରେ ,

କଅଁଳା ବଉଳା

ସଙ୍ଗେ ନନ୍ଦବଳା

ଅପୂର୍ବ ସେ ଶୋଭା ଆହା ସଖିରେ

ହଜିବା ମଜିବା କାହ୍ନୁ ପ୍ରୀତିରେ ।