ଭାବିଲି ଦିନେ କରିବି ମଜା

ଭାବିଲି ଦିନେ କରିବା ମଜା

ସାଙ୍ଗସାଥୀଙ୍କ ମେଳେ

ହଟାତ  ବୁଦ୍ଧି ଜୁଟିଲା ମୋର

ମୁହଁ ସଞ୍ଜର ବେଳେ ।

କେଶକୁ ମୋର ମୁକୁଳା କରି

ତରାଟି ଦୁଇ ଆଖି

ଚାହିଁଲି ତାଙ୍କୁ ଏକ ଲୟରେ

ମୁହଁରେ ରାଗ ମାଖି ।

କହିଲି ଗଳା ମୋଟା ମୁଁ କରି

ଅମୁକ ସାହି ଘର

ମଙ୍ଗୁଳି ବୁଢ଼ୀ ଭୂତ ଆସିଛି

କରିବି ହରବର।

ଗୋଟା ଗୋଟାକୁ ମୋଡି ଖାଇବି

ଆଜି ତ ରକ୍ଷା ନାହିଁ

କହିଲେ ଯାଇ ଜେଜିମାଆକୁ

ଦୌଡ଼ି ଦୌଡ଼ି ଯାଇ ।

ବୁଢ଼ୀ ଆସିଲା କାଣି ଆଙ୍ଗୁଠି

ଧରିଲା ମୋର ଚାପି

ଓଃ କି କଷ୍ଟ ସମ୍ଭାଳି ନେଲି

ଭଗବାନଙ୍କୁ ଜପି ।

କୁଆଡେ ଥିଲା ପଡିଶା ଘର 

ଫତୁରୀ ଜେଜି ବୁଢ଼ୀ

ଝାଡୁଟେ ଧରି ଉଭା ହୋଇଲା 

ପିଟିଲା ହାତ ଯୋଡି ।

ଦୁଇ ପାହାର ବାଜିବା ପରେ 

ଧାଇଁଲି ପ୍ରାଣ ଧରି

ନୁହେଁ ମୁଁ ଭୂତ ନୁହେଁ ମୁଁ ପ୍ରେତ

କହିଲି ଥରି ଥରି ।

ହସିଲେ ସାଙ୍ଗ ଜେଜି ମାଆମାନେ

କହିଲେ ଭଲ ହେଲା

ଆଉ ଏମିତି ମଜା କରିଲେ

ବୁଡିବ ତୋର ଭେଳା ।

ଝାଡୁ ପାହାର କେମିତି ଥିଲା

ପଚାରି ସାଙ୍ଗ ମାନେ

ଦୁଇ ଦୁଇଟି ବିଧା ଥୋଇଲେ

ନୁଆଇଁ ପିଠି ଜଣେ ।

କାନ ମୁଣ୍ଡାକୁ ଆଉଁସି କରି 

କହିଲି ନାହିଁ ନାହିଁ

ଏମିତି ମଜା ଜୀବନେ କେବେ

ଆଉ କରିବି ନାହିଁ।