ଲାଇବ୍ରେରୀ
ପ୍ରୋଫାଇଲ୍
ବାରମ୍ବାର ହାରିଗଲା ପରେ..
ବାରମ୍ବାର ହାରିଗଲା ପରେ..
1 min
82
ବାରମ୍ୱାର ହାରିଗଲା ପରେ
ରଶ୍ମି ରଞ୍ଜନ ସାହୁ
ବାରମ୍ୱାର ହାରିଗଲା ପରେ
ଫିକା ପଡ଼ିଯାଏ ଆଖିର ଯୌବନ
ଓହ୍ଲେଇଯାଏ ଓଠରୁ
ଏ କୋଣରୁ ସେ କୋଣକୁ ପ୍ରସାରିତ
ଗାରଟିଏ ଭଳି ହସ
ବାରମ୍ୱାର ହାରିଗଲା ପରେ
ଉଦାସ ଉଦାସ ଲାଗେ,
କୁହୁଡ଼ିଆ ଦେଖାଯାଏ
ଭୋଗିବାକୁଥିବା ବାକିତକ ଆୟୁଷ
ବାରମ୍ୱାର ହାରିଗଲା ପରେ
ଇଚ୍ଛାହୁଏନି ଶୁଣିବାକୁ
ନିଜ ଛାତିର ଧକ୍ ଧକ୍ ବଢ଼ୁଛି ନା କମୁଛି
ଲାଗେ ସେମାନେ ଯେମିତି
ମୋତେ ଭଣ୍ଡେଇ ଦେଇଛନ୍ତି
ବଢ଼େଇଦେଇ ମୋ ହାତରେ
ଆୟୁଷ ନଥିବା ଗୋଟେ 'ଖୁସି'
ବାରମ୍ବାର ହାରିଗଲା ପରେ
କିଛି ବି ଇଚ୍ଛା ହୁଏନି
କିଛି ବି ନୁହେଁ
ହେଲେ ତଥାପି ଆଖି କୋଣରୁ
ଜକେଇ ଆସେ ଟୋପେ ଲୁହ
ଆଃ....! ଜାଣିହୁଏନି
ବାରମ୍ୱାର ହାରିବାରେ
ଜୀବନ ଘଷରା ହୁଏ ନା ପୁଣି ଅନୁଭବୀ
