ଅମାନିଆଁ ମୁହିଁ
ଅମାନିଆଁ ମୁହିଁ
ଅମାନିଆଁ ମୁହିଁ ମାନେନା ନିୟମ ଖାଇଲେ ଖାଇବି ମାଡ଼,
ଗରମ ରକତ ବହୁଛି ଦେହରେ ହଜମି କରେ ମୁଁ ହାଡ଼ |
ବୁଝିବିନି କିଛି ଯେତେ ବୁଝେଇଲେ ଶୁଣିବିନି କାହା କଥା,
ଉଚ୍ଚସ୍ଵରେ କଟୁକଥା କହିଜାଣେ ପାଇଲେ ପାଉ କେ ବ୍ୟଥା |
କାହାକୁ ଡରେନା ଡରେଇ ପାରେ ମୁଁ ଛାଡ଼ିଦେଇ ଲାଜ ଭୟ,
ମାନ ମହତକୁ ବାଜେକଥା କହି ହିଂସାରେ କରେ ମୁଁ ଜୟ |
ବାଳକୁ କାଟିଛି ସେଲୁନକୁ ଯାଇ ମାଲିସ ପାଲିସ କରି,
ରକେଟ ସମାନ ବାଇକ ଉଡ଼ାଏ ଯୁବତୀ ସାଙ୍ଗରେ ଧରି |
ଛିଣ୍ଡା କପଡ଼ାର ପ୍ୟାଣ୍ଟ ପିନ୍ଧୁଛି ଷ୍ଟାଇଲ ମାରୁଛି ବୁଲି,
କଳାଚୂଟିକୁ ମୁଁ ରଙ୍ଗ ଲଗାଉଛି କେବେ ଧଳା କେବେ ନାଲି |
ରାତିସାରା ମୁହିଁ ଅନିଦ୍ରା ରହୁଛି ଦିନସାରା ଶୋଇରହେ,
ସ୍ଵାଧୀନ ଜୀବନ ନେଇ ବିଚରଣ କରି ଦାମୀଚିଜ ପିଏ |
ସତ୍ୟ-ନ୍ୟାୟକଥା କାନରେ ପଶେନା ଯୁକ୍ତି-ତର୍କ କରିପାରେ,
ଟଙ୍କା ଫୋପାଡ଼ିଲେ ବମ୍ବେ ହିରୋଇନ ଆସି ମୋତେ ଗେଲ କରେ |
ପରମ୍ପରା କହି ଧରି ବସୁ କିଏ ମୋ ଇଚ୍ଛାରେ କରେକାମ,
ଅନ୍ଧବିଶ୍ଵାସ ସେ ପୂଜା-ପାଠ ଧର୍ମ ଜାଣେନା ମୁଁ ଈଷ୍ଟନାମ |
ମୋ ଠାରୁ କେ କିଛି ଆଶା କରିବନି ସୁଖରେ କାଟିବି ଦିନ,
ପାଇଛି ସୁଯୋଗ ସୁବିଧା ସ୍ଵାଧୀନ ବଳେ ଆସୁଥିବ ଧନ |
ନିଜଦୋଷ କେବେ ଧରେନାହିଁ ମୁହିଁ ପରଦୋଷ ଖୋଜୁଥାଏ,
ଦେଇଥିବା କଥା ସବୁ ଭୁଲିଯାଇ କୌଶଳେ ଖସିଯାଏ |
ବଟି ଦିଆନିଆ ଶିଖି ଯାଇଛି ମୁଁ ଲୁହାଦେଖି ପାଣିଦିଏ,
ଯେତେ ସୁଖ ଅଛି ଭୋଗ କରୁଥିବି ଏ’ ଜୀବନ ଥିବାଯାଏ |