Library
Profile
ଅଗଷ୍ଟ କ୍ରାନ୍ତି
ଅଗଷ୍ଟ କ୍ରାନ୍ତି
ଏ ଅଗଷ୍ଟ ଆଉ ପରାଧୀନ ହୋଇ ନାହିଁ
ସେ ସ୍ଵାଧୀନ ହେଲାଣି କାହିଁ କେତେ କାଳୁ
ଏବେ ସେ କିମ୍ବଦନ୍ତୀର ଔଦାର୍ଯ୍ୟ ପୁରୁଷ ,
ତା'ର ବୁଝିବାକୁ ବେଳ ନାହିଁ -
ଧର୍ଷିତା ମାଟିର ବାସ୍ନା ଓ ବୟସ ।
ଅଗଷ୍ଟ ସୁପ୍ତ ଆଜି
ଯେହାଦୀର କମାଣ ମୁନରେ
ଲୁପ୍ତ ତା'ର ଲେଲିହାନ ଶିଖା
ଦୃପ୍ତ ଛାତି ନିରବ ନିଥର ,
ଧର୍ମର ଦ୍ଵାହି ଦେଇ
ଦାବାନଳେ ଜାଳିଦିଏ
ବିଧର୍ମୀ ବିଚାର
ରକ୍ତରେ ଜୁଡୁବୁଡୁ ମାଆର ଶରୀର ।
ନିଷ୍ପାପ ଶିଶୁର ହସ
ନିଭିଯାଏ ଦାନବର କ୍ରୁର କାମାଗ୍ନିରେ
ପ୍ରଷ୍ଫୁଟିତ ହେବା ଆଗୁ କୁମାରୀ କଳିକା
ବୃନ୍ତଚ୍ୟୁତ ହୁଏ ମାଟି ଅଗଣାରେ,
ଫର୍ ଫର ଉଡେ
ଜାତି ବାଦର ଜୈତ୍ର ବାନା
ଜଂଗୀ ଶାସକର ସୁଉଚ୍ଚ ହର୍ମ୍ୟରେ ।
ଅବଲୁପ୍ତ ଏଠି ମାନବିକତାର ମହାନ୍ ମନ୍ତ୍ର
" ସର୍ବେ ଭବନ୍ତୁ ସୁଖିନଃ " ଦିବ୍ୟ ବାଣୀ
ଏକ କାବ୍ୟିକ ପ୍ରଚାର ମାତ୍ର
ମୁଁ ମୋରରେ ସୀମିତ,
ପ୍ରୟୋଜିତ ପ୍ରତାରଣାର ଘୃଣ୍ୟ ବଳୟରେ
ଜନଗଣ ସଭିଏଁ ଆକ୍ରାନ୍ତ
ପଥଭ୍ରଷ୍ଟ ବିଚାର ଦିଗନ୍ତ ।
କ୍ରାନ୍ତି ଆଜି ସାଜେ ପଳାତକ
ଅପହୃତ ଅଗଷ୍ଟର ରକ୍ତ ,
ଅତୀତର ଶୌର୍ଯ୍ୟ ବୀର୍ଯ୍ୟ
ଅହିଂସାର ଗର୍ବ ଓ ଗୌରବ
ଅସହିଷ୍ଣୁତାର ଜଙ୍ଗଲ ରେ ସୁପ୍ତ ।
ଆଜି ବି ଆସିଛି ଅଗଷ୍ଟ
ଉଡାଇ ତା' ବାନା ବୈଜୟନ୍ତୀ,
ଐତିହ୍ୟର ପରାକ୍ରମ
ନିଜେ ଗାଇ ନିଜର ପ୍ରଶସ୍ତି ;
ହେ ଅଗଷ୍ଟ ! କ୍ରାନ୍ତିର ବାହକ
ତୋ ପାଦେ ଏତିକି ବିନତି,
ଦେ’ - ଥରେ ଜଳାଇ ଦେ’
ତୋ ଲେଲିହାନ ଦିପ୍ତି
ନୂତନ ସୂର୍ଯ୍ୟର ଆଭା
ଅଗ୍ନିବର୍ଷି କ୍ରାନ୍ତି ,
ସଂତ୍ରାସର ଅନ୍ତ ହେଉ
ଧରା ବକ୍ଷେ ବ୍ୟାପିଯାଉ ଶାନ୍ତି
ସଦ୍ ଭାବନାର ନିର୍ମଳ ପ୍ରଶାନ୍ତି ।।
ଶ୍ରଦ୍ଧାର ସହ
ଭକ୍ତ ଚରଣ ମଲ୍ଲ
ନେମ୍ବରା, କେନ୍ଦ୍ରାପଡା ।
9th August 2018.
