ଲେଖକୀୟ
ଲେଖକୀୟ
ବଡ ବିଚିତ୍ର ଏ ଲେଖକ ଜୀବନ
ରାତି ରାତି ଉଜାଗର ଖିଆଲି ପବନ,
କେଉଁଠି ସାତ ସନ୍ଧିରେ ବି'
ଖୋଜୁଥାଏ ନିଜର ଆସ୍ଥାନ ।
ଥରେ ପଶିଗଲେ ଘାଇଲା କରେ
ବ୍ୟାଘ୍ର ପରି ଘୋଷାଡି ପାରେ
ନେଇପାରେ ବି' ଜୀବନ ,
ବିରାଟ ବନିଥିବା ବାହାପିଆ ଶାସକଙ୍କୁ
ଫିଙ୍ଗି ଦେଇପାରେ ସେ ପବନ
ଭାଙ୍ଗିଦେଇ ପାରେ
ତାଙ୍କର ବତ୍ରିଶ ସିଂହାସନ ।
ବଡ ବିଚିତ୍ର ଏ ଲେଖକ ଜୀବନ
ନିଜକୁ ନିଜେ ଓପାସରେ ରଖେ
ଓପାସରେ ରହୁଥିବା ବୁଭୁକ୍ଷୁ ପାଇଁ
ଚଳାଏ କଲମ,
କେବେ ସବାର ହୁଏ ପୁଞ୍ଜିପତି କାନ୍ଧରେ
ତ' କେବେ କଲମ ହାତେ
ହାଜର୍ ହୁଏ ସାହୁକାର ଦ୍ବାରେ
ସେମାନେ ତଳକୁ ନ ଖସିବା ପର୍ଯ୍ଯନ୍ତ
ଚାଲିଥାଏ କଲମର ଜୁଲମ୍ ।
କଲମ କେବେ ହୋଇନି
କାହାର ଗୋଲାମ୍ ,
ନିପିଡିତ ମାନଙ୍କ ପାଇଁ
ସର୍ବଶ୍ରେଷ୍ଠ ମହଷୌଧି
ଦୁର୍ଦ୍ଦିନର ଅବ୍ୟର୍ଥ ମଲମ ।
ବଡ ବିଚିତ୍ର ଏ ଲେଖକ ଜୀବନ
ହତାଶ ସୈନିକ ହାତରେ
ଧରେଇ ପାରେ ବନ୍ଧୁକ,
ଖୋଲିପାରେ ଧର୍ମବାଗୀଶ ଙ୍କ
କଳା କାରନାମା ର ସିନ୍ଦୁକ ।
ଧର୍ମାନ୍ଧତାରୁ ମୁକ୍ତ କରିପାରେ
ଆଣିପାରେ ସଂହତି ଓ ସଂସ୍କାର
ଆଣିପାରେ ସହିଷ୍ଣୁତା ଓ ବିଚାର ,
ଖୋଲି ବି' ଦେଇପାରେ ପରାଧିନତାର ଶୃଙ୍ଖଳ
କରିପାରେ ଗୋଟେ ଦେଶକୁ ସ୍ବାଧୀନ ।
ବଡ ବିଚିତ୍ର ଏ ଲେଖକ ଜୀବନ
ସଜାଡି ପାରେ ସଂବିଧାନ
ସନ୍ତ୍ରାସକୁ କରିପାରେ ଜୁର
ସଂପ୍ରୀତି ରେ ବାନ୍ଧିପାରେ
କୋଟି ଗଣ ମନ,
ଭୂମିରୁ ଭୂମା ପର୍ଯ୍ଯନ୍ତ ସବୁଠି ତା' ସତ୍ତା
ସ୍ଥିତି ତା'ର ନିତ୍ୟ ବର୍ତ୍ତମାନ ।
ବଡ ବିଚିତ୍ର ଏ ଲେଖକ ଜୀବନ ।।
ଶ୍ରଦ୍ଧା ର ସହ
ଭକ୍ତ ଚରଣ ମଲ୍ଲ
ନେମ୍ବରା, କେନ୍ଦ୍ରାପଡା ।
12th September 2018.