ଅଦିନ ବରଷା

ଅଦିନ ବରଷା ଗାଉଛି ସଙ୍ଗୀତ

ବିଜୁଳି କୁ ସାଥେ ନେଇ।

ସନ୍ଧ୍ୟା ରେ ସଭିଙ୍କ ମନ କରି ଭେଦ

ଲାଜର ଓଢଣୀ ଦେଇ ।

ତନୁ ମନ ସବୁ ପ୍ରିୟା କଥା ଭାବେ

ଭିଜିବାକୁ ଚାହେଁ ଆଜି ।

ପ୍ରେମର ନିଆଁକୁ ଲଗାଇ ମନରେ

ପ୍ରେମିକ ଟିଏ ମୁଁ ସାଜି ।

ନୟନରେ ନାଚେ ପ୍ରିୟାର ଅଧର

ରୂପ ଦିଶେ ତା ଗୋଲାପି ।

ଆଖି ଧୀରେ ବୁଜି ଝିପି ଝିପି ସୁରେ

ନାଚେ ପ୍ରିୟା ପାଦ ଚିପି ।

ରିମିଝିମି ବର୍ଷା ଓଦା ଓଦା ରାସ୍ତା

ସନ୍ଧ୍ୟା ଯେ ଅଟେ ସୁରିଲା ।

ଓଦା ପଣତ ତା ଲାଜେ ଭିଜୁଥାଏ

ମନକୁ ମୋର ମୋହିଲା ।

ସନ୍ଧ୍ୟା ଗଡ଼ିଗଲା ପୁନେଇଁ ଜହ୍ନକୁ

ଛୁଇଁଲା ଅଦିନ ଝରା ।

ପ୍ରିୟା ମୋର ଚାହେଁ ଆକାଶ ଛାତିକୁ

ଦେଖିବାକୁ କୁଆଁ ତାରା ।