ଆସ ମା ଅବତରି

ସରସ ଶରତ ସାନ୍ଦ୍ର ପ୍ରଭାତେ ମାଆ ଆସ ଅବତରି

ବିନିଦ୍ର ରଜନୀ ଶାନ୍ତ ସୌରଭ ଅନ୍ତରେ ଉଠେ ସଞ୍ଚରି ।

ତୁମ ଲାଗି ଆଜି ଏ ମହୀ ସଜ୍ଜିତ

ତୁମେ ହେବ ବୋଲି ସାଦରେ ପୂଜିତ

ରହିଛି ପ୍ରତୀକ୍ଷା କରି

ପଞ୍ଚ ମହାଭୁତ ଓ ଜୀଵ ଜଗତ ଲଭିବେ କୃପା ତୁମରି ।

ତୁମେ ପୂଜ୍ୟ ଆଜି ତୁମ ଉତ୍ସବରେ

ପ୍ରେରଣା ତୁମେ ହିଁ ତୁମରି ପୂଜାରେ

କେଉଁ ଆୟୋଜନ କରି

କରିବୁ ହେ ମାତ ତୁମକୁ ସନ୍ତୁଷ୍ଟ ଦିଅ ହୃଦେ ଭକ୍ତି ଭରି ।

ଦୁର କର ମାଗୋ ଏ ଧରାର ବ୍ୟଥା

ଦାନବ ଉପରେ ବିଜୟର ଗାଥା

ରିପୁସୁଦନ କାଣ୍ଡାରି

ଅସତ୍ୟ ଅଧର୍ମ ପରେ କରୁ ଜୟ ତୁମ ଶକ୍ତି ଲାଭ କରି ।

ତୁମେ ପରା ଅଟ ଜଗତ ଜନନୀ

ତୁମ କୃପା ନିଧି ଲଭୁ ଏ ଅବନୀ

ପାର୍ବଣରେ ଏହି ଅଳି

ଦଶହରା ପରେ ରହିବୁ ମା ପାଶେ ଯିବୁ ନାହିଁ ତ୍ୟାଗ କରି ।