ଚୁଳ ବୁଲିଆ ମନ

ମନ ନାଏ ରହେ ଘଡ଼େ କି ବେଲେ ଥାବେ ,

ହମିସାରି ବୁଲୁଥିସି ଥଏ ନେଇ କେଭେ !

ସବୁ ଠାନେ ନାଏ ପାରେ ଚୁପରହି ,

ଟୁପୁର ଟାପୁର ଗୁପା ଗୁନଲା ହଇ !

ଭାବୁଥୁସି ଆଝିର ମୁଇଁ ସରଗେ ହେମି ରଜା ,

ଆର ଘଡ଼େ ପରେ ବଜନିଆଁ ଘରର୍ ବଜା !

ମନେ ଭାବି କହୁଛେ ଦିନେ କେଁ ଧନ ଦରବ ଗଦା ,

ସୁଇ କରି ଉଠଳା ବେଳେ କୁରିଆ ଘରେ ଦିଶେ ଚନ୍ଦା !

ଫୁଳେ ଫଳେ ଗଢ଼ମି ଗୁଟେ ସୁନର ଦେଉଳ ,

ଇଥର ମୁଇଁ ଆମ୍ବଗଛେ ଦେଖବ ଫଲାମି ମହୁଳ !

ତତେ ବିହା ହଇଁ କରମି ମନର ରାନୀ ,

ଗାଡ଼ି ମଟର ଚଲାମି ନିଶ୍ଚେ ମୁଇଁ ପାନି !

ହମିସା ଖାଲି ମାରୁଛେ ଫୁଟାଣି ,

ବସି ଖାଏବୁ ଜାହାକେ ଯେତେ ଖଣି !