ଆମ ରାଜଧାନୀ(ଶିଶୁ କବିତା)

ଆମ ରାଜଧାନୀ ଭୁବନେଶ୍ୱର

ସବୁଜିମା ଭରା ସ୍ୱଚ୍ଛ ସହର ।

ବିଧାନସଭାରୁ ବାଣୀବିହାର

ଦିଶେ କି ସୁନ୍ଦର କି ମନୋହର ।

ମନ୍ଦିର ମାଳିନୀ ସହର ବୋଲି

ଜଗତରେ ହୁରି ପଡୁଚି ଖାଲି ।

ଲିଙ୍ଗରାଜ,ରାଜାରାଣୀ ମନ୍ଦିର

ଖଣ୍ଡଗିରି ଗୁମ୍ଫା କେଡେ ସୁନ୍ଦର ।

କେଦାର ଗଉରୀ,ଧଉଳିସ୍ତୁପ

ଦେଖିଲେ ମନରୁ ହରେ ସନ୍ତାପ ।

ନାନା ପଶୁପକ୍ଷୀ ରହି ଅଛନ୍ତି

ନନ୍ଦନକାନନ ଲୋକେ କହନ୍ତି ।

ବାଘ,ଭାଲୁ,ହାତୀ,ସିଂହ,ଗୟଳ

ଯେତେ ଦେଖୁଥିବ ଲାଗିବ ଭଲ ।

ଥରେ ଦେଖିଥିଲେ ଚିଡିଆଖାନା

ଫେରିବାକୁ ଇଚ୍ଛା ହେବନି ଜମା ।

ରାଜ୍ୟପାଳଙ୍କର ଅଛି ଭବନ

ରାଜଭବନ ମୋ ରାଜ୍ୟମହାନ ।

ସୁନ୍ଦର ଉଦ୍ୟାନ ଫୁଲରେ ଶୋଭା

ଜନମନ କିଣି ନେଉଛି ଅବା ।

ଦେଶବିଦେଶରୁ ଆସନ୍ତି ଲୋକ

ଦେଖି ସେ ଭବନ ଭୁଲନ୍ତି ଭୋକ ।

ଚକ୍ ଚକ୍ ଦିଶେ ପିଚୁ ସଡକ

ଗାଡି ମାଳମାଳ ଲମ୍ବ ଅନେକ ।

ରାସ୍ତା କଡେକଡେ ବିଜୁଳିବତୀ

ଦିନରାତି ଏଠି ଶୋଭା ପାଆନ୍ତି ।

ଗର୍ବଗଉରବ ମୋ ରାଜଧାନୀ

ଓଡିଶା ମାଟିର ମୋତିର ଖଣି ।

ଶରତ ଚନ୍ଦ୍ର ଜାଲି,ପଥରା

ତା:୧/୭/୧୮