ଆକାଶ କଇଁଆ ଚିଲିକା ମାଛ

ପାଠ ନାହିଁ ମୋର ସ୍ବପ୍ନଟି ନିଜର

ଦିବାସ୍ୱପ୍ନେ ଅଧିକାରୀ

ଅନର୍ଗଳ କହେ ଇଂରାଜୀ ମନରେ

ଜ୍ଞାନୀ ଗୁଣୀ ଯିବେ ହାରୀ ll

ଚାଲି ଜାଣେ ନାହିଁ ବାଜୁଛି ଗୋଇଠି

ଜାଲ ବିଚ୍ଛେ ତିମି ପାଇଁ

କେରାଣ୍ଡି ଡେଇଁଲେ ଛାତିଟି ଚହଲେ

ମୋ ପରି ବୀରକେ ନାହିଁ ll

ମୁହଁ ଇସିପାତ ପଛ ସନିପାତ

କଥା ଟାଣ କାମ ଶୂନ

ମରୁଭୂମି ପରେ ଶୂନ୍ୟରେ ପହଁରେ

ମିଥ୍ୟା ଗର୍ବେ ମନ ଟାଣ ll

ଜାଗା ଗୁଣ୍ଠେ ନାହିଁ ଚନ୍ଦ୍ର ଜାଗା ପାଇଁ

ମନ ମୋର ହାଇଁପାଇଁ

ଲଣ୍ଠନ ଲଗାଇ ଏଲିଡ଼ କହଇ

ମନ ମୋର ସ୍ଥିର ନାହିଁ ll

କଥାରେ କଥାରେ ମନ୍ତ୍ରୀ ପରିଚିତ 

ମାଉସୀ ପୁଅଯେ ଭାଇ

ଦେଖି ଦେଖି ମରେ ନକରି ମୁଁ ଭାବେ

ଭାଗ୍ୟଫଳ ଭଲ ନାହିଁ ll

ଡ଼ଙ୍ଗା ମୁଁ କିଣିଲେ ଇଲିସି ଧରିବି

ଖାଇବାକୁ ଭାରୀ ମନ

ଆକାଶ କଇଁଆ ଚିଲିକାର ମାଛ

ଭାବୁ ଭାବୁ ଯାଏ ଦିନ ll

ଶୋଇକି ଖଟରେ  ବୁଲୁଛି ଆକାଶେ

ମୁଣ୍ଡ ମୋର ଝାଇଁ ଝାଇଁ

ଧୁବ୍ର ତାରା ଧରି ଶୂନ୍ୟରେ ଖେଳୁଛି 

ମୁହେଁ ମୋର ଲଜ୍ଜ୍ୟା ନାହିଁ ll

ବଲ ମୁଁ ଧରିନି ବୋଲଡ କରିଛି 

ତେନ୍ଦୁଲକର ଛାନିଆଁ

ଧନ୍ୟ ମୋର ମନ ଲଗାମ ବିହୀନ

ଜିତିଵି ସତେ ଦୁନିଆଁ ll

ବୟସ ଷୋହଳ ମାଧୁରୀରେ ମନ

ହୁଅନ୍ତାକି ମୋର ସାଙ୍ଗ

ନିତି ଦେଖୁଥାନ୍ତି ଚନ୍ଦ୍ର ବଦନୀ କି

ପିଉଥାନ୍ତି ପ୍ରୀତି ଭାଙ୍ଗ ll

ଦେହ ମୋର କଙ୍କି ହିରୋ ମୁଇଁ ହେବି

ଶକ୍ତିମାନ ବାହୁବଳୀ

ଏଭରେଷ୍ଟ ଗିରି ଡେଇଁ ମୁଁ ପଡିବି

ଚୀନ ମୋ ଦେହର ମଳି ll

ସ୍ବପ୍ନ ଦେଖିବାଟା ନୁହେଁ ଛୋଟ କଥା

ବାସ୍ତବତା ସ୍ବପ୍ନ ନିଶା 

ଅସମ୍ଭବ ଇଛା ମନୁ ଛାଡୁ ବସା

ନ ହେଲେଯେ ଲୋକହସା ll