तुझ्याचसोबत

तुझ्याचसोबत होतो म्हणूनी सहज संपली वाट 

चालेस्तोवर अंबरात या धुके दाटले दाट

तुझ्याचसोबत होतो म्हणूनी कसलाही हिशेब नव्हता

कुठे जायचे ? कसे जायचे ? कसलाही प्रश्नच नव्हता 

तुझ्याचसोबत होतो म्हणूनी सुस्पष्ट झाली दिशा 

तूच माझं व्यसन नि आता तूच माझी नशा 

तुझ्याचसोबत होतो म्हणूनी अधिकच गुंतत गेला जीव 

उरलं आता दोघांमध्ये केवळ जाणीव आणि नेणीव 

तुझ्याचसोबत होतो म्हणूनी जुळले धागे बसली वीण 

हात तुझा हाती आल्यावर कसला थकवा, कसला शीण

तुझ्याचसोबत होतो म्हणूनी अस्तित्व आज दरवळले

समेवरती येई येईतो सारे शब्द नि सूर विरघळले 

तुझ्याचसोबत होतो म्हणूनी ग्रीष्मात बरसल्या सरी

गात्रांचा जाहला कंप अन अंगार चेतला उरी 

तुझ्याचसोबत होतो म्हणूनी ऐलाकाठी आला पैल 

बंधन तुटले देहाचे या अन पंचप्राण झाला सैल