स्मृती

मेघ ओल्या भावनांची, शब्दरूपी आंदणे..

आठवांच्या साठवांची, चंद्रमोळी कोंदणे..

तोडीतो अन् जोडीतो, प्रितीस्मृतीच्या श्रृंखला

गोड-गोडी नागमोडी, शर्वरी आवर्तने..

आर्त भेसूर चातकाचे, रागदारी रूदन

ऐकेल का आतातरी, पाषाणहृदयी वरूण

या इथे अन् त्या तिथे, दाही दिशी गुंजारव

या कुशीहून त्या कुशीला,रात-राती जागणं..

वाहते इंद्रायणी, धमन्यांतूनी ही नीरव

व्याकुळला राधेस का, यमुनातीरी तो माधव

यशोधरेला ना उरे, बुद्धातला करूणाकर

ध्यानस्थ तो मेरूशिरी, पीनाकपाणी शेखर