सारे सुखाचे सोबती

सारे सुखाचे सोबती । माझं माझं करत येती 

संकट समय येता । दिसेनासे सारे होती 

रीत आहे जगाची । आनंदात होती गोळा

पळती रे दूर पुन्हा । पाहती दुरुन कळा

प्रकाश वाटे हवासा । जातो सुखावून हृदयास

अंधाराची भिती मात्र । सर्वांच्या मनास

जत्रा भरता येई उधाण । थवे नकली मुखवट्यांचे

पाले उठता राहती ।अवशेष आठवणीचे

मन होई रे उदास । आठवणीच्या हिंदोळ्याने

व्रण तसेच राहती । खोल जखमाने

किलबिल रे पक्ष्यांची । होई फळ झाडावरती

पानगळ वृक्ष मात्र । पाहत राहती

अशी सारी दुनियादारी । तोंडावर तजवीज

पाठ फिरता सुरु होई । फक्त कुजबूज