पाऊस तुमचा माझा

तुमच्यासाठी असेल आशिक पाऊस

आमच्यासाठी नुसती त्सुनामी

छप्पर सांधेपर्यंत घुसते

दारामधूनी तुफान पाणी

तुम्हास त्याचे कौतुक भारी

आमच्या साठी संकट दारी

तुम्ही रचिता प्रेमकविता

आम्हा ग्रासते उद्याची चिंता

लेकरांसंगे मौजमजेच्या

वर्षासहली निघती तुमच्या

कौतुक काय आम्हास तयाचे 

घरीच शिरते पाणी आमुच्या

सुरकूतली गाठोडी आयुष्याची

थंडी भरुनी कुठे कुडकूडती

दूर कुठेतरी बाळे सानुली

भुकेने आर्त विव्हळत रडती 

भिजून गेली चूल बिचारी

शिजवावयास तरी काय उरले?? 

लाकडेही सर्व ठार ओली

दुर्लभ दोन घासही झाले 

पाऊस तोच तो एकसारखा

तुमच्या माझ्या छपरावरचा

फरक इतुकाच आहे वेड्या

तो बरसतो.....

दारी पागोळ्यातूनी तुझ्या अन्

इथे पापणीआडून आईच्या...!!