पापणीच्या काठावर
पापणीच्या काठावर
पापणीच्या काठावर
नीज केव्हाची अडून
आत यावया लाजते
कोणी बसले लपून.
पापणीच्या काठावर
रेषा काजळ रेखिली
छबी सख्या साजणाची
ऐन्यामध्ये निरखिली.
पापणीच्या काठावर
थवा उतरे स्वप्नांचा
चारा कोवळया आशेचा,
चुरा चांदणं मोत्यांचा.
पापणीच्या काठावर
रोजचीच ये-जा झाली,
रानामध्ये आठवांच्या
चिंब पहाट भिजली.
पापणीच्या काठावर
आज अशा सांजवेळी
मन कातर कातर,
भास करतात खेळी.