कोजागिरीची रात
कोजागिरीची रात
1 min
246
कशी जादू भारलेली,
कोजागिरीची ही रात,
कुणी भिजती, जळती
त्याच चांदणं आगीत. || १.
आज चांद मातलेला
कशी सावरू सावरू
मन नाही थाऱ्यावर
कळेनाच काय करू ||२.
कुठे गुंतला काय की,
मन सख्याचे कळेना,
चंद्र चांदणं पाहून
तोल आज का ढळेना ||३.
नकळत, की कळत
कथा जातसे गुंतत
जीव माझा रे, तुझ्यात,
तुझा आणखी कुणात ||४.
तेच तेच काय सांगू,
हीच रोजचीच व्यथा,
एक आसू ढाळुनिया
आता संपविते कथा. ||५.