जोडीदार

दिवसाच्या साथीला राती,

दिव्याच्या साथीला वाती

अभंग तशीच सजना........

तुझी नि माझी प्रीती !।।धृ।।

    आले सोडून आईबाप,

    जणू भाताचे मी रोप

    डोळ्यात सुखाची स्वप्ने......

    नको उडवू माझी झोप !  (१)

नको बंगला आणिक गाडी,

नको मजला पैठणी साडी

दे प्रेम आणि सन्मान.......

घेऊ काळजी थोडी थोडी !  (२)

    मुरलेली लोणच्याची फोड,

    थोडी आंबट थोडी गोड

    सोडून आपलाच हेका.......

    करू दोघेही तडजोड!   (३)

नको वचने सात जन्माची,

हवी साथ याच जन्माची

कधी हसणे अन् कधी रुसणे.....

वाढेल गोडी प्रेमाची !   (४)

     या संसार वेलीवर,

     भिरभिरतील फुलपाखरं

     चिवचिवाट हा चिमण्यांचा......

     गोकुळ होईल मग घर !   (५)

करू इतके समर्पण,

बघता एक दर्पण

एकमेकांच्या प्रतिबिंबाचे.......

बघ होईल दर्शन !   (६)

     नाही करीत अपेक्षा फार,

     तू जगण्याचा आधार

     संसाररूपी विश्वात......

     तू आदर्श जोडीदार !   (७)