दरिद्री दिवाळी

बघा आली ही दिवाळी, आनंदाचा सण मोठा,

बाप माझा कर्जामंदी, हसतोय खोटा खोटा ||१||

दिवे लागले अंगणी,

ज्योत बगा ही जळली,

आग गरिबी नावाची ,

माझ्या बापाला पोळली ||२||

निम्म्या कर्जात बापाच्या,

सारी सोयाबीन गेली,

माय कणखर माझी,

धीर देताना रडली ||३||

मला आठवते माय,

तिची संसाराची गोडी,

स्वतःसाठी तिने कदी,

नाही घेतली हो साडी ||४||

गुरु नाम ती जपते,

माय पावलोपावली,

माय आशा धरी मनी,

येईल गुरुमाऊली ||५||

आई म्हणे कधी कधी,

बाळा शिकून हो मोठा,

पोरा नष्ट कर हा तू,

गरिबीचा वरवंटा ||६||

बाप म्हणतोया माझा,

प्रयत्न तू सोडू नको,

मही आमचं जे झालं,

आता ते तू भोगू नको||७||

 निजे आसवांत मी ,

सपान मला पडते,

माझ्या मोठ्या यशामदी,

आई खुशीत रडते ||८||

माय माझी सुगरण,

संसाराची भाजे पोळी,

बाप लपवतो सत्य,

होई आनंदी दिवाळी ||९||