चिमणी

विसरली जगणे खुशाली मानवा गगनात चिमणी

आज करणीने जगाच्या धाडली स्वर्गात चिमणी

हरवले अंगण घराचे वाळवण बाहेर गेले

वाळवण टिपण्यास तेव्हा यायची दारात चिमणी

रोज येऊनी घरी ती आरसा नुसताच पाही

काल अस्तित्वास अपुल्या पाह्यची काचात चिमणी

झाड मोठे तोडले अन स्वच्छता केली घराची

त्याच झाडावर सुखाने राह्यची खोप्यात चिमणी

मी गुराढोरास विकले टाकला तोडून गोठा

ती किडे अन मच्छरांना खायची गोठ्यात चिमणी

त्या चिऊ अन कावळ्याची गोष्ट आता सांग आजी

बस कथेचा भाग झाली लाडकी साऱ्यात चिमणी

हाक लाडाने कधी मी पोटच्या पोरीस देतो

ती पुढे येताच निघते साद या ओठात चिमणी

मानवा सवयी तुझ्या ह्या जीवघेण्या फार आहे

त्याच सवयीने बिचारी आणली धोक्यात चिमणी

लावला फोटो तिचा मी दावण्या नाता सुनांना

तसबिरीमध्येच दिसते आजच्या वाड्यात चिमणी