बळीराजा

आभाळं का रूसलं

त्याची दिसनां का रग 

कटाळला बळीराजा 

कुठं लपलं रं ढग ॥

रुसला का तू पावसा रे

काही चुकलं का माझं?

धरणीमाय आसुसली

तुझं पेलावया वझं ॥

धरा टाकीला नांगर 

जुंपली नांगराला लेकं

होवू दे आवंदा जोंधळा

कर सपान पूरं एक ॥

आरं कठोर पावसा 

बिज पेराया बरसं

सोसल्या दुष्काळाच्या झळा

झाली किती रे वरिसं ॥

उपवर झाली लेकं

तीला लागू दे हळदं

उजळाया लेकीला मी

कर्ज घेतलं नगद ॥

तरसली रं जनावरं

पाणी नाही चारा, घास

आला नाही जर का आता

घेईन गळ्याला मी फासं ॥