बदनाम तो क्षण..
बदनाम तो क्षण..
त्यास बदनामीचा लागलेला कलंक खोटा फार होता
आलेला तो शापित क्षणही किती जोरदार होता
मजला हरविण्यास आला तो बदनाम क्षण
तो आला हा तर केवढा वांछनीय उपकार होता
फसलो मी असा समज तयांनी करून घेतला
तो तर मी मलाच दिलेला सुखद फटकार होता
मुखवटा लुटला गेला निर्वस्त्र ही झालो पार
झालो बदनाम तो तर केवढा सत्कार होता
गडबडलो धडपडलो वळलो क्षणभर थांबून मी
एका वेगळ्याच विग्रहाचा तो तर ललकार होता
उपासना ती आमुचीच बदनाम मात्र तो क्षण झाला
जागविण्यास आलेला तो तर फक्त एक किरदार होता