ಸ್ವಾತಂತ್ರ್ಯದ ಮಂತ್ರ

ಶತಶತಮಾನಗಳ ಅವಮಾನದ ದಹನ

ಪರಕೀಯರ ಶೋಷಣೆಯ ದಮನ

ಆಂಗ್ಲರು ಭಾರತ ಬಿಟ್ಟು ಹೋಗಿದ್ದಾರೆ ಓಡಿ

ಕಳಚಿಕೊಂಡಿತು ಬಂಧನದ ಬೇಡಿ

ಭಗತ್, ಸುಭಾಷರ ಹೋರಾಟದ ಕೆಚ್ಚು

ತಿಲಕ್, ಲಜಪತರ ಸಿಡಿಮಾತಿನ ಕಿಚ್ಚು

ಬಿಳಿಯರ ಎದೆಗೆ ಬೆಂಕಿ ಇಟ್ಟಿತು ನೋಡಿ

ಕಳಚಿಕೊಂಡಿತು ಬಂಧನದ ಬೇಡಿ

ಭಾರತಮಾತೆಗೆ ಸ್ವಾತಂತ್ರ್ಯದ ಉದ್ಘೋಷವೇ ಝೇಂಕಾರ

ವೀರರ ಕೆಂಪು ನೆತ್ತರೇ ಅಲಂಕಾರ

ಪಂಜರದ ಗಿಣಿಗಳು ಹಾಡಿದವು ಕೂಡಿ

ಕಳಚಿಕೊಂಡಿತು ಬಂಧನದ ಬೇಡಿ

ಬ್ರಿಟೀಷರದ್ದೋ ಕೆಣಕಿ ಸೆಣಸುವ ಧೈರ್ಯ

ಭಾರತೀಯರದ್ದೋ ಮಣಿಸಿ ಮುಗಿಸುವ ಶೌರ್ಯ

Advertisement

ಕೊನೆಗೂ ಗೆದ್ದೆವು ಎಡೆಬಿಡದೆ ಹೋರಾಡಿ

ಕಳಚಿಕೊಂಡಿತು ಬಂಧನದ ಬೇಡಿ

ಭಾರತದ ಕಡೆಗೆ ದೃಷ್ಟಿ ನೆಟ್ಟಿರುವ

ದುಷ್ಟ ಶಕ್ತಿಗಳ ಕಡೆಗಣಿಸಬೇಡಿ

ಸ್ವಾತಂತ್ರ್ಯವೀರರ ಎಂದೂ ಮರೆಯಬೇಡಿ

ಕಳಚಿಕೊಳ್ಳೋಣ ಬನ್ನಿ ಬಂಧನದ ಬೇಡಿ