ದಾರಿಹೋಕನ ಪದಗಳು

ಉಪಕಾರವದು ಪುಣ್ಯವೋ ಪರಪೀಡನೆ ಪಾಪವೋ

ಪುಣ್ಯವನು ಗಳಿಸುತ್ತ ಧರ್ಮದಲಿ ನಡೆಯುತ್ತ

ಕರ್ಮದಲಿ ಸಮತೆಯ ಕಾಣುತಿರು ಶ್ರದ್ಧೆಯಲಿ ನಿತ್ಯ

ಎಸಗುತಿರು ಒಳಿತನ್ನು - ದಾರಿಹೋಕ

 

ಹೊರಗಿನ ಬೆಂಕಿಯನು ಆರಿಸಲು ಆಗುವುದು

ಒಳಗಿರುವ ಕಿಚ್ಚನು ನಂದಿಸಲು ಆಗುವುದೆ ?

ಒಳಗಿನ ಬೆಂಕಿ ಮನ ಮನೆಯ ಸುಟ್ಟರೆ ಲೋಗರ

ಜೀವನವು ಸಾಗುವುದೇ ? - ದಾರಿಹೋಕ

 

ಸಾವಿರದ ಮನೆಯುಂಟೆ ನೋವಿರದ ಮನಸುಂಟೆ

ಸುಖವುಂಟೆ ಹಿತವುಂಟೆ ಎನ್ನುವರು ಹಲವಾರು

ಇರುವುದು ಇರಲೇನು ಬರುವುದು ಬರಲೇನು ಏನೊಂದ

ಗೌರವಿಸಿ ಸ್ವೀಕರಿಸು - ದಾರಿಹೋಕ

ನಿನ್ನೆಗಳ ನೆನೆಯುತ ನಾಳೆಗಳ ಚಿಂತಿಸುತ

ಈ ದಿನದ ಕ್ಷಣಗಳ ಮರೆವುದು ಸರಿಯೇನು?

ಆಗಮನ ನಿರ್ಗಮನ ವಿಧಿಯಾಟ ಆಗಿರಲವನ

ದಾಳದ ಗರವು ಹಿರಿದೊ – ದಾರಿಹೋಕ

ಕಳ್ಳರ ಸಂತೆಯಲಿ ಉತ್ತಮರ ಹುಡುಕುವುದು

ತೂತಾದ ಮಡಕೆಯಲಿ ನೀರನ್ನು ತುಂಬುವುದು

ಕಳ್ಳನಿದ್ರೆಯ ಜನರ ಎಚ್ಚರಿಸೆ ಹೋಗುವುದೆಲ್ಲವೂ

ವ್ಯರ್ಥ ಕಾಯಕ ತಿಳಿಯೊ - ದಾರಿಹೋಕ