ಆಸೆ
ಆಸೆ
ಕೃಷ್ಣನ ಕೊಳಲಿನ ದನಿ ನಾನಾಗುತ
ನಿನ್ನಯ ಕರಣವ ಸೇರುವ ಆಸೆ
ತಂಗಾಳಿಯ ತಂಪು ನಾನಾಗಿ
ನಿನ್ನನು ಸ್ಪರ್ಶಿಸುವ ಆಸೆ
ಬಿಸಿಲ ಬೇಗೆಯ ನಡುವೆ ಮರ ನಾನಾಗಿ
ನಿನಗೆ ನೆರಳಾಗುವ ಆಸೆ
ಹಸಿರ ನಡುವಲಿ ಅರಳುವ ಮಲ್ಲಿಗೆ ನಾನಾಗಿ
ಮೆಲ್ಲಗೆ ನಿನ್ನಯ ಮುಡಿಸೇರುವ ಆಸೆ
ನಿನ್ನಯ ಕಾಲ್ಗೆಜ್ಜೆಯ ನಾದ ನಾನಾಗಿ
ನಿನ್ನಯ ಹೆಜ್ಜೆಯ ಲಜ್ಜೆಯಾಗುವ ಆಸೆ
ನಿನ್ನಯ ಮುಗುಳುನಗು ನಾನಾಗಿ
ನಿನ್ನ ನಗುವಿಗೆ ಕಾರಣ ನಾನಾಗುವ ಆಸೆ
ನಿನ್ನಯ ಕಣ್ಹನಿಯ ಒರೆಸುವ ಕೈ ನಾನಾಗಿ
ಕಣ್ಣ ಕಾಯುವ ಆ ರೆಪ್ಪೆಯಾಗುವ ಆಸೆ....
ನಿನ್ನಯ ಕೈ ಬಳೆಯು ನಾನಾಗಿ
ನೀ ನಡೆವದಾರಿಗೆ ಕಾವಲಾಗುವ ಆಸೆ...
ನಿನ್ನಯ ಮುಪ್ಪಿನಲಿ ಊರುಗೋಲು ನಾನಾಗಿ
ನೀ ಎಡವದಂತೆ ಜೋಪಾನ ಮಾಡುವ ಆಸೆ
ನಿನ್ನಯ ಮಗುವಾಗಿ ..ನಿನ್ನಯ ನಗುವಾಗಿ
ನಿನ್ನವಳಾಗಿಯೇ ಇರುವ ಆಸೆ !